ԵՄ-ում դիտարկում են Կալլասին դիվանագիտական ծառայության ղեկավարի լիազորություններից զրկելու հնարավորությունը. ԶԼՄ

Եվրամիության անդամ երկրները դիտարկում են ԵՄ դիվանագիտական ծառայության հնարավոր արմատական բարեփոխումների տարբերակներ՝ Եվրոպական արտաքին գործողությունների ծառայության (EEAS) և դրա ղեկավար Կայա Կալլասի աշխատանքային անհաջողությունների ֆոնին։ Այս մասին հայտնում է Financial Times (FT) թերթը՝ հղում անելով իր աղբյուրներին։

«Ակնհայտ է, որ (EEAS)-ը չի աշխատում այնպես, ինչպես պետք է աշխատեր ժամանակակից աշխարհում։ Այն դիսֆունկցիոնալ է։ Խնդիրը կառուցվածքային է, ուստի կառուցվածքը պետք է վերանայել»,– մեջբերում է թերթը աղբյուրի մեկնաբանությունը։

Նշվում է, որ եվրոպական երկրները քննարկում են Կալլասին և 1 միլիարդ եվրո բյուջե ունեցող նրա գերատեսչությանը լիազորություններից զրկելու հնարավորությունը՝ նպատակ ունենալով EEAS-ի գործառույթները փոխանցել Եվրամիության անդամ երկրներին։

Աղբյուրների տեղեկատվությամբ՝ Փարիզի առաջարկը ներառում է եվրոպական դիվանագիտական ծառայության ղեկավարի ինքնուրույնության հնարավոր սահմանափակում և ամբողջ աշխարհում գտնվող պատվիրակությունների նկատմամբ նրա վերահսկողության թուլացում։ Արդյունքում, ինչպես ընդգծում են աղբյուրները, «իրական ռիսկ կա, որ [EEAS]-ը կոչնչացվի»։ Միևնույն ժամանակ, մասնակից երկրների ներկայացուցիչները վստահ են, որ EEAS-ի բարեփոխումը կարող է օգնել խնայել միջոցները Բրյուսելում և զգալիորեն կրճատել բյուրոկրատական ապարատը։

Եվրոպական որոշ մայրաքաղաքներ մասնավոր զրույցներում պնդում էին, որ այս պահին չափազանց մեծ համընկնում և համակարգման բացակայություն կա EEAS-ի, ազգային ԱԳՆ-ների, ինչպես նաև Եվրոպական հանձնաժողովի և ԵՄ Խորհրդի արտաքին կապերի բաժինների միջև։ Ավելին, Եվրամիությանը պատուհասած ճգնաժամերը եվրոպացի քաղաքական գործիչներին ստիպել են կասկածի տակ դնել EEAS-ի դերի արդյունավետությունը ժամանակին որոշումների կայացումը համակարգելու գործում։ Նշվում է նաև, որ Կալլասը հաճախ արտահայտում է սեփական կարծիքը այն հարցերի վերաբերյալ, որոնց պատասխանը պետք է կոլեկտիվ համաձայնեցված լինի։