Բազմաթիվ բողոքների արժանացած հանրակրթության նոր պետական չափորոշիչը հաստատվեց

Կառավարության այսօրվա նիստում հաստատվեց Հանրակրթության պետական նոր չափորոշիչը, որը վերջին մեկ տարում հանրության մի հատվածի քննարկումների ու բողոքների կիզակետում էր:

Ըստ նախագծի հեղինակների՝ նոր չափորոշչի ամենակարևոր փոփոխությունը հայեցակարգային է, այսուհետ այն հիմնվելու է կարողությունների վրա, այսինքն՝ որպես հանրակրթության հիմական անելիք՝ հավասարապես շեշտադրվելու են գիտելիքը, հմտությունը, դիրքորոշումները և արժեքային բաղադրիչը:

«Խուսափելով այս պահին գործող առարկայակենտրոն մոտեցումից, որի պայմաններում մենք ունենք առանձին առարկաներ, և շեշտադրված է այդ առարկաների ինքնավար գոյությունը դպրոցում, անցում կատարել ինտեգրված մոտեցմանը, որը հնարավորություն է տալիս տարբեր առանձնացնել խաչվող գաղափարները»,- նախագիծը ներկայացնելով՝ ասաց ԿԳՄՍ փոխնախարար Ժաննա Ալեքսանյանը:

Ըստ փոխնախարարի՝ այս չափորոշիչը հնարավորություն է տալիս խուսափել կրկնություններից, առավել արդյունավետ օգտագործել երեխայի ժամանակը: Չափորոշչով, ըստ Ալեքսանյանի, նվազեցվում է դպրոցականների ծանրաբեռնվածությունը՝ չկրճատելով բովանդակային ծավալը: Անկախ չափորոշչով տրված 7 ուսումնական բնագավառներից որևէ մեկի ընտրության հնարավորության սահմանվել են 4 պարտադիր առարկաներ՝ Հայոց լեզու և գրականություն, Մաթեմատիկա, Հայոց պատմություն և Օտար լեզու, որոնք ունեն երաշխավորված ժամաքանակ բոլոր դպրոցներում՝ անկախ իրենց կազմակերպաիրավական ձևից:

Փոփոխվելու է նաև գնահատման համակարգը, միավորային գնահատումը պետք է գործի 5-րդ դասարանի 2-րդ կիսամյակից, այլ կերպ ասած՝ տարրական դպրոցում միավորային գնահատման գործող տարբերակը դադարելու է գործել: Ներդրվելու են «խրախուսող և խթանող» գնահատման ձևեր: Նախատեսվում է նաև հրաժարվել անբավարար գնահատականային շեմից:

Մինչ ներդումը նախագիծն անցնելու է փորձարկում, որի մեկնարկը տրվելու է 2021թ. սեպտեմբերից: Չափորոշիչը դպրոցներում կներդրվի 2023թ.-ից:

«Միայն կրթությամբ հնարավոր չէ լուծել մեր բոլոր հարցերը, պրոբլեմները, բայց չկա որևէ հարց մեր օրակարգի, չկա որևէ մի պրոբլեմ, որի լուծումը հնարավոր է առանց կրթական բաղադրիչի: Ամենատարբեր ոլորտներում, սկսած քաղաքականությունից, շարունակելով օրենսդրական գործունեությամբ, շարունակելով իրավապահ համակարգով, շարունակելով ԶՈՒ: Բոլոր ոլորտներում… Եվ հետևաբար՝ կրթության չափորոշչի այս ընդունումը ես համարում եմ մեր կարևորագույն ռեֆորմներից մեկը և շատ կարևոր եմ համարում, որ մենք ունեցել ենք կամք այս պայմաններում այս ռեֆորմը հասցնել մինչև այս կետը: Եվ շատ կարևոր եմ համարում, որ շարունակենք այդ ռեֆորմի իրագործումը»,- ասաց Նիկոլ Փաշինյանը:

Կարդացեք նաև