Նեթանյահուն ողջունել է Թրամփի հայտարարությունը Սաուդյան Արաբիայի՝ Աբրահամյան համաձայնագրերին միանալու պահանջի մասին

Իսրայելի վարչապետ Բինյամին Նեթանյահուն ողջունել է ԱՄՆ առաջնորդ Դոնալդ Թրամփի հայտարարությունը Սաուդյան Արաբիայի՝ հրեական պետության հետ կապերի կարգավորման վերաբերյալ Աբրահամյան համաձայնագրերին միանալու անհրաժեշտության մասին՝ նախքան Վաշինգտոնի կողմից Էր Ռիադի հետ ատոմային էներգետիկայի ոլորտում համաձայնագրի հավանության արժանանալը։

«Ինչպես ասաց նախագահ Թրամփը, Սաուդյան Արաբիայի միացումն Աբրահամյան համաձայնագրերին պատմական քայլ կլիներ դեպի Մերձավոր Արևելքում խաղաղություն», - ասված է Իսրայելի վարչապետի գրասենյակի հայտարարության մեջ։ «Խաղաղություն ուժի միջոցով», - մեկնաբանել են այս պայմանը Նեթանյահուի գերատեսչությունում՝ պարզաբանելով, որ «Թեհրանի դեմ ԱՄՆ-ի և Իսրայելի համատեղ ռազմական գործողությունները և Իսրայելի կողմից Իրանի սատելիտների ճնշումը հնարավորություն են ստեղծել խաղաղության շրջանակի ընդլայնման համար»։

Ավելի վաղ Թրամփը Truth Social-ում գրել էր, որ Էր Ռիադի հետ ատոմային էներգետիկայի ոլորտում գործարքի հավանությունը «լիովին կախված է Սաուդյան Արաբիայի՝ Աբրահամյան համաձայնագրերին միանալուց»։ Ինչպես հուլիսի 22-ին հայտնել էր Վաշինգտոնի վարչակազմը, հիշատակված պայմանագիրը ստորագրել են ԱՄՆ-ի և Սաուդյան Արաբիայի էներգետիկայի նախարարներ Քրիս Ռայթը և Աբդել Ազիզ բեն Սալման Ալ Սաուդը։ Հայտարարության մեջ ընդգծվում է, որ գործարքը փոխանցվել է ԱՄՆ Կոնգրեսի քննարկմանը։ Ինչպես նշվում է փաստաթղթում, այն նախատեսված է մի քանի տասնամյակի համար և կոչված է «ամերիկյան ընկերություններին լայն հնարավորություններ բացելու Սաուդյան Արաբիայի ատոմային էներգետիկայի զարգացման ծրագրին մասնակցելու համար»։

Աբրահամյան համաձայնագրերը կնքվել էին Իսրայելի և մի շարք արաբական երկրների միջև ԱՄՆ-ի միջնորդությամբ 2020-2021 թվականներին։ 2020 թվականին Իսրայելի հետ հարաբերությունները կարգավորել են Բահրեյնը, Մարոկկոն և Միացյալ Արաբական Ամիրայությունները։ 2021 թվականին հրեական պետության հետ դիվանագիտական հարաբերություններ հաստատելու մասին է հայտարարել Սուդանը։ Մինչև այս համաձայնագրերի կնքումը Իսրայելն արաբական պետություններից դիվանագիտական ​​հարաբերություններ ուներ միայն Եգիպտոսի հետ՝ 1979 թվականին, և Հորդանանի հետ՝ 1994 թվականին։