Լեհաստանի նախկին վարչապետը Լվովի քաղաքապետին կոչ է արել ներողություն խնդրել Կաչինսկուց և Վարշավայից

Լեհաստանի նախկին վարչապետ (2017-2023 թթ.) Մատեուշ Մորավեցկին հայտարարել է, որ Լվովի քաղաքապետ Անդրեյ Սադովին պետք է ներողություն խնդրի ընդդիմադիր «Օրենք և արդարություն» (PiS) կուսակցության առաջնորդ Յարոսլավ Կաչինսկուց՝ դատական հայցերով սպառնալու համար։

«Լվովի քաղաքապետը սպառնում է Կաչինսկուն դատարանո՞վ։ «Օրենք և արդարություն» կուսակցության առաջնորդի՞ն, որը պատերազմի ամենածանր պահին կանգնած էր Ուկրաինայի կողքին։ Սա խայտառակություն է։ Սա սկանդալ է», - գրել է Մորավեցկին Facebook-ում։

Նա հավելել է, որ Սադովին պետք է հիշի, թե որքան բան է արել Լեհաստանը Կիևի համար վերջին մի քանի տարիների ընթացքում, և որ առանց Վարշավայի օգնության «Լվովն այսօր կարող էր բոլորովին այլ տեսք ունենալ»։

Ավելի վաղ Կաչինսկին Լվովի քաղաքապետին անվանել էր «բացահայտ բանդերական»։

Սադովին Լեհաստանում քննադատության թիրախ է դարձել այն բանից հետո, երբ մարտի վերջին Լվովի իշխանությունները խզել են լեհական Control Process ընկերության հետ աղբի վերամշակման գործարան կառուցելու պայմանագիրը, որին մեղադրել էին իբր նախագծի իրականացումը ձգձգելու մեջ։ Լեհական կողմի հայտարարության համաձայն՝ պայմանագիրը խզվել է օբյեկտի կառուցման ավարտական փուլում (95% պատրաստվածություն)։ Ընդգծվում է, որ Սադովին իր որոշումը կայացրել է ի հեճուկս արբիտրաժային դատարանի վճռի, որը պաշտպանել էր լեհական ընկերությանը։ Բացի այդ, Լվովի իշխանությունները ընկերությանը չեն վճարել 6 միլիոն եվրո՝ 34 միլիոն եվրո ընդհանուր գումարով պայմանագրի պայմաններում։