Չնայած լարվածությանը՝ Սպիտակ տանը շարունակում են նախապատրաստվել Չինաստանի նախագահի այցին

Չնայած Սպիտակ տան ղեկավար Դոնալդ Թրամփի՝ ԱՄՆ ընտրությունների ընթացքին Պեկինի միջամտության վերաբերյալ պնդումներին, ՉԺՀ նախագահ Սի Ցզինպինի՝ սեպտեմբերին ԱՄՆ կատարելիք այցի նախապատրաստական աշխատանքները շարունակվում են։ Այս մասին լրագրողներին հայտնել է ԱՄՆ պետքարտուղար Մարկո Ռուբիոն։

«Մենք ակնկալում ենք, որ այցը տեղի կունենա սեպտեմբերին», - ասել է նա։ Ամերիկյան արտաքին քաղաքական գերատեսչության ղեկավարի խոսքով՝ չինական կողմը «շարունակում է աշխատակիցների խմբեր ուղարկել՝ դրան նախապատրաստվելու համար»։ «Ես որևէ բան չեմ լսել, որը հակասի դրան։ Ես հիմքեր չունեմ կարծելու, որ նրանք չեն ժամանի։ Սա կարևոր է», - հավելել է պետքարտուղարը։

«Երբ կան այնպիսի խոշոր և հզոր պետություններ, ինչպիսիք են ԱՄՆ-ն և Չինաստանը, միշտ էլ լինելու են գրգռիչներ։ Միշտ լինելու են հարցեր, որոնց շուրջ մենք համաձայն չենք։ Բայց, կարծում եմ, մեր երկրների պես հզոր և նշանակալի երկրները պարտավոր են շարունակել երկխոսությունը և պահպանել հարաբերությունները», - ընդգծել է Ռուբիոն։

ՉԺՀ ԱԳՆ պաշտոնական ներկայացուցիչ Լին Ցզյանը ԱՄՆ իշխանությունների նոր մեղադրանքները բնութագրել է որպես «զուտ հորինվածք և չարամիտ զրպարտություն»։ Հուլիսի 16-ին քաղաքացիներին ուղղված հեռուստաուղերձում Թրամփը պնդել էր, որ Չինաստանը լայնածավալ փորձեր է ձեռնարկել ազդելու ամերիկյան ընտրական գործընթացների վրա, այդ թվում՝ 2020 թվականին։ Ըստ ԱՄՆ նախագահի վարկածի՝ այսպես կոչված «խորքային պետությունը» Վաշինգտոնի ղեկավարությունից և հանրությունից թաքցրել է ընտրություններին օտարերկրյա միջամտության մասշտաբների մասին տեղեկատվությունը։

Հուլիսի սկզբին ամերիկացի առաջնորդը հայտնել էր, որ Սի Ցզինպինի այցը Վաշինգտոն տեղի կունենա նախնական հաշվարկով սեպտեմբերի 24-ին։ Թրամփը Պեկին էր այցելել մայիսի 14-15-ը։