ՆԱՏՕ-ի հետախուզական ինքնաթիռը կարճատև թռիչք է կատարել Սև ծովի վրայով․ ԶԼՄ

ՆԱՏՕ-ի Bombardier Challenger 650 Artemis II հետախուզական և թիրախային նշորդման ինքնաթիռը Սև ծովի արևմտյան մասում՝ չեզոք ջրերի վրայով, ոչ բնորոշ կարճատև թռիչք է կատարել։ Այս մասին ՏԱՍՍ-ին հայտնել է Եվրամիության ավիադիսպետչերական ծառայությունների աղբյուրը։

«Ինքնաթիռը թռել է ռումինական Կոնստանցայում գտնվող իր բազավորման օդանավակայանից, որից հետո մի քանի շրջան է կատարել չեզոք ջրերի վրայով և մոտ 40 րոպե անց վայրէջք կատարել», - ասել է գործակալության զրուցակիցը։ Նա նշել է, որ օդում գտնվելու այսքան կարճ տևողությունը ոչ բնորոշ է ինքնաթիռի համար, որը, որպես կանոն, թռչում է մի քանի ժամ՝ այդ թվում Սև ծովի ողջ ջրատարածքով՝ արևմուտքից արևելք և հակառակը։

Գործակալության զրուցակիցը հիշեցրել է, որ վերջին ամիսներին Bombardier Challenger 650 Artemis II-ը բազմիցս նկատվել է Սև ծովի հարավային մասում, որտեղ, որպես կանոն, շարժվում է չեզոք ջրերի վրայով՝ չմտնելով որևէ երկրի օդային տարածք՝ բացառությամբ Ռումինիայի։ Բացի այդ, նախօրեին գրեթե երեք ամսվա ընթացքում առաջին անգամ Սև ծովի վրայով արձանագրվել է ՆԱՏՕ-ի RQ-4D Phoenix ռազմավարական հետախուզական անօդաչու թռչող սարքի թռիչքը, որը ժամանել էր Սիցիլիայի Սիգոնելա ռազմակայանից։ Այն նույնպես մի քանի շրջան է կատարել ջրատարածքի հարավային մասում՝ արևմուտքից արևելք։