ՀՅԴ Լիբանանի Հայ Դատի Մարմինը Նամակ Մը Յղեց Հոլանտայի Խորհրդարանի Նախագահին

ՀՅԴ Լիբանանի Հայ դատի մարմինը երէկ Հոլանտայի խորհրդարանի նախագահ Խատիժա Արիպին յղեց նամակ մը, որուն մէջ գնահատեց խորհրդարանին կողմէ Թուրքիոյ նախագահ Ռեճեփ Թայիփ Էրտողանի 24 ապրիլ 2019-ին կատարած յայտարարութիւնը դատապարտող բանաձեւի որդեգրումը:

«Արեւելեան Անատոլուի մէջ իսլամ կիները, երեխաները, ծերերը սպաննած հայ աւազակախումբերու եւ անոնց աջակցութիւն ցոյց տուածներու աքսորումը այդ ժամանակաշրջանին ամէնէն տրամաբանական քայլն էր», յայտարարած էր Էրտողան:

Հայ դատի մարմինը նշեց, որ հոլանտական խորհրդարանը քաջարի եւ սկզբունքային կեցուածք որդեգրեց ժխտումի քաղաքականութեան, ինչպէս նաեւ Հայոց ցեղասպանութեան 1,5 միլիոն զոհերուն յիշատակը անարգելով մարդկային արժանապատուութիւնը վիրաւորող այդ յայտարարութեան դէմ` աւելցնելով, որ այդ որոշումը նախադէպ մըն է եւ այլ խորհրդարաններու համար բնորդ մը:

Մարմինը յայտնեց, որ նշեալ որոշումի որդեգրումը համահունչ էր խորհրդարանին 2004-ին, 2015-ին եւ 2018-ին որդեգրած Հայոց ցեղասպանութիւնը ճանչցող որոշումներուն:

ՀՅԴ Լիբանանի Հայ դատի մարմինը ողջունեց Հոլանտայի Ներկայացուցիչներու տունը` Թուրքիոյ նախագահի ժխտողական խօսքերը մերժելուն եւ մարդկային իրաւունքները պաշտպանելուն համար:

aztagdaily.com