Ընդդիմադիրների գրպանից՝ ՔՊ-ականների գրպանը

«Հրապարակ» թերթը գրել է. «Սահմանադրության օրվա առթիվ Ազգային ժողովի նախագահը պարգևատրել է ԱԺ պատգամավորներին: «Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 12- րդ կետով՝ կարգադրում եմ. Սահմանադրության օրվա առթիվ Ազգային ժողովի պատգամավորներին խրախուսել միանվագ դրամական պարգևատրմամբ՝ համաձայն հավելվածի»,- կարդում ենք պաշտոնական հրամանում:

Բնականաբար, ԱԺ կայքում սույն հրամանի հետ հավելված չի ներկայացվել, և հասկանալի չէ, թե խոսքը որ պատգամավորների և, առհասարակ, ինչ գումարի մասին է: Սակայն, մեր տեղեկություններով, դրամական պարգևի արժանացել են միայն «Քաղպայմանագրի» պատգամավորները: Սահմանադրության օրվա առթիվ ՔՊ-ականներին խորհրդարանի ղեկավարը պարգևատրել է թերևս նրա համար, որ հնազանդորեն դակում են մայր օրենքն աղճատող՝ իշխանության թիվ մեկ սահմանադրագետ Վահագն Հովակիմյանի երկնած նախագծերը:

«Ոչ, մենք պարգևատրում չենք ստացել, ավելին՝ վերջին երկու ամիսներին ընդդիմադիր պատգամավորներից շատերիս աշխատավարձերից էականորեն պահումներ են արվել»,- մեզ հետ զրույցում ասաց «Հայաստան» խմբակցության պատգամավոր Ագնեսա Խամոյանը:

Որոշ տեղեկություններով, խոսքը 150-300 հազար դրամ պահումների մասին է: Վերջին ամիսներին՝ դիմադրության շարժումը սկսվելուց հետո, դրանից էլ առաջ, երբ ընդդիմադիրները մեկնել էին Արցախ, սակայն Բերձորից նրանց թույլ չտվեցին առաջ գնալ, ԱԺ ղեկավարությունը նիստերից ու քվեարկություններից բացակայությունների հիմքով ընդդիմադիր պատգամավորների աշխատավարձերից պահումներ էր արել՝ հաշվի չառնելով, որ ընդիմադիրները հայտարարել են քաղաքական բոյկոտի մասին:

Պահումները տարբեր պատգամավորների պարագայում տարբեր են՝ կախված այն հանգամանքից, թե որ հանձնաժողովի անդամ է տվյալ պատգամավորը, հանձնաժողովը որքան հաճախակի է նիստեր հրավիրել։ Հետևաբար՝ որքան շատ են բացակայությունները, այնքան մեծ է պահվող գումարը: «Պատգամավորներ կան, որ հունիս ամսին 200 հազար դրամ աշխատավարձ էլ չեն ստացել»,- ասաց մեր աղբյուրը:

Խորհրդարանում վերջին շաբաթներին խոսում են, որ ընդդիմադիրներից պահված գումարը, որը համարվում է տնտեսում, ԱԺ ղեկավարությունը բաշխել է ՔՊ-ականների միջև․ երեկվա կարգադրությունը, ըստ էության, հաստատեց այդ տեղեկությունը: Ավելին՝ տևական լռությունից հետո ՔՊ-ականները երեկ կրկին հիշեցին ընդդիմությանը և խորհրդարանի արտահերթ նիստում առանձնակի ժրաջանությամբ «անդրադարձան» նրանց՝ թերևս փորձելով արդարացնել ստացած պարգևավճարները: Ռուբեն Ռուբինյանը, օրինակ, վերլուծեց ընդդիմության վերջին օրերի գործողությունները և եզրահանգեց. «Մեր ընդդիմադիր գործընկերները հիմա փողոցում չեն, այստեղ չեն, երբ նրանց հարցնում են՝ վերադառնալո՞ւ են ԱԺ, նրանք ասում են՝ վերադառնալու ենք մեր օրակարգով։ Լավ, ո՞րն է իրենց օրակարգը»։

Ապա շարունակեց. «Իսկ նրանց հանրային ակտիվությունը վերջին օրերին սահմանափակվել է հետևյալով՝ հրաժարականներ իրենց պաշտոններից այստեղ, մի քանի հոգու դեպքում էլ՝ մանդատներ վայր դնելը: Հետևաբար` կարելի է եզրակացնել, որ այս օրերին ընդդիմության միակ օրակարգն ԱԺ-ից գլխիկոր փախչելն է»:

ՔՊ խմբակցության պատգամավոր Արմեն Խաչատրյանն էլ նկատեց՝ ընդդիմությունը հայտնի է կառավարության հասցեին բոցաշունչ մեղադրանքներով և դրանց հիմքում միշտ բանակն է դնում, մեղադրում, թե իշխանությունը բանակ չի ուզում․ «Իսկ ո՞ւր է ընդդիմությունը, որ կարծիք ասեր այս փաթեթների վերաբերյալ, սուր հարցեր տար պաշտպանության նախարարին»։ Ռուբինյանն ասվածին հավելեց․ «Որ փողոցում լինեին, կասեինք՝ փողոցում են, բայց ո՛չ փողոցում են, ո՛չ այստեղ։ Տարօրինակ իրավիճակ է»։ ՔՊ խմբակցության պատգամավոր Գուրգեն Արսենյանը ևս խոսքն ուղղեց ընդդիմությանը, ասաց, որ երբ հարցը հասնում է հայրենիքի պաշտպանությանը, ընդդիմությունը նախընտրում է Երևանում պաշտպանել հայրենիքը, իսկ երբ հարցը հասնում է եռամսյա հավաքներին, գերադասում է հանդես գալ որպես «կիսապաշտպան»։

Ռուբեն Ռուբինյանն Արսենյանի ելույթը ևս որպես առիթ օգտագործեց ու հավելեց․ «Ես կասեի՝ ոչ թե կիսապաշտպան, այլ՝ 4-րդ մրցավար»։ Իսկ խորհրդարանը նոն-ստոպ ռեժիմով քննարկում էր «Պաշտպանության մասին» օրենքում փոփոխությունների նախագիծը»:

Առավել մանրամասն՝ թերթի այսօրվա համարում։