Նեթանյահուն Ռուբիոյի հետ քննարկել է Միջազգային քրեական դատարանի դեմ ուղղված Վաշինգտոնի գործողությունները

Իսրայելի վարչապետ Բենիամին Նեթանյահուն հայտնել է, որ ԱՄՆ պետքարտուղար Մարկո Ռուբիոյի հետ քննարկել է Վաշինգտոնի վճռական գործելու մտադրությունը Միջազգային քրեական դատարանի (ՄՔԴ) դեմ, որի գլխավոր դատախազ Քարիմ Խանն ավելի վաղ հեռացվել էր պաշտոնից։ Այդ մասին կառավարության ղեկավարը հայտարարել է Իսրայելի կառավարության շաբաթական նիստի սկզբում։

«Ես խոսել եմ Ռուբիոյի հետ, և նա հաստատել է Միացյալ Նահանգների մտադրությունը՝ վճռականորեն գործելու այս կազմակերպության դեմ, որը սպառնում է արդարադատությանը ողջ աշխարհում, ինչպես նաև ժողովրդավարական երկրների, ինքնիշխան երկրների՝ իրենց ինքնիշխանությունն իրականացնելու իրավունքին և, ըստ էության, փորձում է ստրկացնել նրանց անվտանգությունը Հաագայի կոռումպացված պաշտոնյաների բանաձևերի միջոցով», - ասել է Նեթանյահուն։ «Կարծում եմ, որ սա շատ դրական զարգացում է, և կարևոր եմ համարում, որ մենք տարածենք այս պրակտիկան ողջ աշխարհում», - հավելել է նա։ Նեթանյահուի կարծիքով՝ «երկրների ճնշող մեծամասնության՝ Խանին պաշտոնանկ անելու որոշումը» «մերկացրել է անարդարությունն ու խորը կոռուպցիան, որոնք գոյություն ունեն ոչ միայն դատախազությունում, այլև ողջ ՄՔԴ-ում»։

2024 թվականի նոյեմբերին ՄՔԴ-ն ձերբակալության օրդերներ էր տվել Նեթանյահուի և Իսրայելի նախկին պաշտպանության նախարար Յոավ Գալանտի նկատմամբ՝ Գազայի հատվածում հակամարտության հետ կապված ռազմական հանցագործությունների և մարդկության դեմ ուղղված հանցագործությունների մեղադրանքներով, չնայած այն հանգամանքին, որ Իսրայելը չի ճանաչում դատարանի իրավասությունը։ Նեթանյահուի խոսքով՝ Խանն այդ քայլին է դիմել՝ «ուշադրությունը շեղելու» իր դեմ ուղղված սեռական ոտնձգությունների մեղադրանքներից և «սեփական պաշտպանության համար իր շուրջը մոբիլիզացնելու Իսրայելի բոլոր թշնամիներին»։ «Հենց այդ պատճառով էլ նա չեղարկել է իր այցն Իսրայել, չեղարկել այն հայտարարությունները, որոնք արել էր Իսրայելի դատական համակարգի և մանրակրկիտ հետաքննություն անցկացնելու անհրաժեշտության մասին, և անմիջապես անցել է իմ և պաշտպանության նախկին նախարար Գալանտի դեմ օրդերների առաջմղմանը», - հավելել է Իսրայելի վարչապետը։

Հուլիսի 24-ին Նյու Յորքում Հռոմի ստատուտի մասնակից պետությունների վեհաժողովի նախագահ Պյայվի Կոկուրանտան հատուկ նիստի ընթացքում հայտարարել է, որ վերահսկող մարմինը որոշում է ընդունել Խանին պաշտոնանկ անել սեռական ոտնձգությունների մեղադրանքների պատճառով։ Նա հստակեցրել է, որ նրա հեռացման օգտին քվեարկել է ՄՔԴ-ի 125 երկրներից 82-ը։