Ադրբեջանական կողմի կրակոցների պատճառով այս պահին Սոթքի հանքի աշխատանքները դադարեցված են, աշխատակիցները տարհանվել են. Շահնազարյան

Ադրբեջանական կողմի կրակոցների պատճառով այս պահին Սոթքի հանքի աշխատանքները դադարեցված են, աշխատակիցները տարհանվել են, Aysor.am-ի թղթակցի հետ զրույցում ասել է Գեղամասար խոշորացված համայնքի ղեկավարի խորհրդական Դավիթ Շահնազարյանը։

Նրա խոսքով՝ այս պահին էլ հակառակորդի կրակոցները շարունակվում են։ Թե քանի աշխատակից է հանքի տարածքից տարհանվել, Շահնազարյանը չմանրամասնեց՝ միայն նշելով, որ այս պահին հանքում աշխատանքներ չեն կատարվում։

«Հանքի ուղղությամբ ադրբեջանցիները սկսել են կրակել մոտ 1 ժամ առաջ։ Երեկ երեկոյան ևս կրակել են», - ասել է նա։

Դավիթ Շահնազարյանը միաժամանակ տեղեկացրել է, որ այս պահին հարաբերական հանգիստ վիճակ է Նորաբակ համայնքի ուղղությամբ, այնտեղ կրակոցներ չեն լսվել։