ԱՄՆ 250-ամյակը՝ առանց աստղերի. Թրամփը ծրագրում է հանրահավաք անցկացնել

ԱՄՆ նախագահ Դոնալդ Թրամփը հայտարարել է, որ դիտարկում է Անկախության օրվա կապակցությամբ Վաշինգտոնում նախատեսված արտիստների մի շարք ելույթները «Ամերիկան վերադարձել է» հանրահավաքով փոխարինելու հնարավորությունը՝ նրանցից շատերի մասնակցությունից հրաժարվելուց հետո։

Ինչպես ավելի վաղ հայտնել էր CBS հեռուստաալիքը, չորեքշաբթի օրը՝ ԱՄՆ-ի 250-ամյակի տոնակատարության համար Վաշինգտոնում ստեղծված «Freedom 250» երկկուսակցական ոչ առևտրային կազմակերպությունը հրապարակել էր այն արտիստների նախնական ցանկը, որոնց ելույթները նախատեսված էին միջոցառումների ժամանակ։ Սակայն հայտարարված աստղերի մեծ մասը ցուցակի հրապարակումից կարճ ժամանակ անց հրաժարվեցին մասնակցել։

«Ես հասկանում եմ, որ չորեքշաբթի օրը արտիստները «լարված» էին իրենց առաջիկա ելույթի պատճառով, ուստի ես մտածում եմ նրանց փոխարեն ներգրավել Աշխարհի Գլխավոր Աստղին <...>։ Ես հանձնարարել եմ իմ ներկայացուցիչներին ուսումնասիրել Վաշինգտոնում, Կոլումբիայի շրջանում, նույն ժամանակ և նույն վայրում «Ամերիկան վերադարձել է» հանրահավաք անցկացնելու հնարավորությունը», - գրել է Սպիտակ տան ղեկավարը Truth Social-ում։

Ամերիկացի առաջնորդը միաժամանակ հայտարարել է, որ «կարևոր ելույթ» է ունենալու՝ նշելով, որ կցանկանար, որ իրեն «շրջապատեն երջանիկ, խելացի և հաջողակ մարդիկ, ովքեր գիտեն, թե ինչպես հաղթել»։ Թրամփի կարծիքով՝ իր ելույթները ավելի շատ հանդիսատես են հավաքում, քան ամերիկացի երգիչ Էլվիս Փրեսլին՝ իր փառքի գագաթնակետին։