Լուկաշենկոն հայտարարել է, որ Ուկրաինայում բելառուս զինվորներ չեն եղել և չեն լինելու

Բելառուսի նախագահ Ալեքսանդր Լուկաշենկոն հայտարարել է, որ բելառուս զինծառայողները չեն մասնակցել և չեն մասնակցելու Ուկրաինայի տարածքում մղվող ռազմական գործողություններին։

Աստանայում ԵԱՏՄ գագաթնաժողովի շրջանակներում պետության ղեկավարը լրագրողներին պատմել է, որ բազմիցս մտածել է վերջին շրջանում Մինսկի հասցեին Վլադիմիր Զելենսկու կոշտ հայտարարությունների պատճառների մասին։ Ինչպես մեջբերում է «Բելտա»-ն, Լուկաշենկոյի խոսքով՝ Կիևին նման հռետորաբանության են մղում եվրոպական առանձին երկրներ։

Բելառուսի առաջնորդը նշել է, որ Մինսկը կապեր է պահպանում ԱՄՆ-ի հետ և ԱՄՆ նախագահ Դոնալդ Թրամփի դիրքորոշումը համարում է հասկանալի։ Նրա խոսքով՝ ամերիկյան կողմը երկխոսություն է վարում, մինչդեռ եվրոպական պետությունների ներկայացուցիչները, ինչպես նա է արտահայտվել, ճնշում են գործադրում Կիևի վրա՝ դրդելով նրան ավելի ակտիվ արտահայտվել Բելառուսի կողմից հնարավոր հարձակման թեմայի շուրջ։

Այդ կապակցությամբ Լուկաշենկոն կրկին ընդգծել է, որ Բելառուսի հարձակումն Ուկրաինայի վրա բացառված է։ Նա նաև հայտարարել է, որ բելառուս զինծառայողներ ուկրաինական տարածքում չեն եղել և չեն լինելու՝ հավելելով, որ այդ մասին տեղյակ են ինչպես զինվորականները, այնպես էլ Զելենսկին։