Հայաստանը պատրաստ է համագործակցել ԵԱՏՄ շրջանակներում արհեստական բանականության զարգացման ուղղությամբ․ Մհեր Գրիգորյան

Հայաստանը պատրաստ է համագործակցել ԵԱՏՄ շրջանակներում արհեստական բանականության (ԱԲ) զարգացման ուղղությամբ, հայտարարել է հանրապետության փոխվարչապետ Մհեր Գրիգորյանը։

Նրա խոսքով՝ Երևանը ԵԱՏՄ երկրներում ԱԲ տեխնոլոգիաների զարգացման գործում կարևոր քայլ է համարում միության շրջանակներում արհեստական բանականության պատասխանատու զարգացման մասին համատեղ հայտարարության ընդունումը։ Նա հավելել է, որ փաստաթուղթն ամրագրում է տեխնոլոգիաների էթիկայի, անվտանգության և թափանցիկության ընդհանուր սկզբունքները՝ համագործակցությունը կողմնորոշելով դեպի միության երկրների քաղաքացիների և տնտեսությունների իրական կարիքները։

«Համոզված եմ, որ արհեստական բանականության զարգացման նկատմամբ պատասխանատու և նորարարական մոտեցումը թույլ կտա մեր երկրներին ձևավորել կայուն, անվտանգ և մրցունակ ապագա։ Հայաստանը պատրաստ է առարկայական երկխոսության և համատեղ գործնական աշխատանքի՝ այս ուղղությամբ բոլոր համատեղ նախաձեռնությունների իրականացման համար», - հայտարարել է Գրիգորյանը Աստանայում ընթացող Եվրասիական տնտեսական ֆորումի ժամանակ։

Եվրասիական տնտեսական ֆորումը Ղազախստանի մայրաքաղաքում անցկացվում է մայիսի 28-ից 29-ը։ Դրան մասնակցում է շուրջ 3 հազար մարդ 44 երկրից, այդ թվում՝ ԱՄՆ-ից։ Ֆորումի ընթացքում քննարկվում են թվայնացմանը, տնտեսական զարգացմանը և նոր տեխնոլոգիաներին վերաբերող հարցեր։ 2026 թվականին միջոցառումն անցկացվում է Ղազախստանի նախագահությամբ։