Լրահոս

Խորհրդարանում շարունակում են բուռն քննարկել առաջին ընթերցմամբ ընդունած օրենքի նախագիծը, ըստ որի քրեական ենթամշակույթ կրող խմբավորում ստեղծելը կամ ղեկավարելը պատժվելու է ազատազրկմամբ հինգից տասը տարի ժամկետով: 

Այս ձմեռը կանցկացնենք գազի համար նույն սակագինը վճարելով: Այսօր հանրային ծառայությունները կարգավորող հանձնաժողովի նախագահը հայտարարել է, որ սակագինը նույնը կմնա առնվազն մինչև ապրիլ, հաջորդ տարվա համար չի փոխվի ջրի գինը:

ՀՀ հատուկ քննչական ծառայությունում քննվող քրեական գործով ձեռք բերված բավարար ապացույցների համակցության հիման վրա Սյունիքի նախկին մարզպետ Սուրիկ Խաչատրյանը ներգրավվել է որպես մեղադրյալ ՀՀ քրեական օրենսգրքի 309-րդ հոդվածի 1-ին մասով, 38-179-րդ հոդվածի 3-րդ մասի 1-ին կետով և 38-314-րդ հոդվածի 1-ին մասով նախատեսված այն հանցավոր արարքների կատարման համար, որ նա դուրս է եկել իր լիազորությունների շրջանակից, ինչպես նաև, պաշտոնեական դիրքն օգտագործելով և անձանց ապօրինի կարգադրություն տալով, դրդել է կատարել առանձնապես խոշոր չափերի վատնում ու պաշտոնեական կեղծիք, ինչի հետևանքով էական վնաս է պատճառել պետության օրինական շահերին:

ԿԳՄՍ նախարար Արայիկ Հարությունյանն իր նեղ շրջապատում հայտարարել է, որ բոլոր այն ուսանողները, որոնք արդեն երկու շաբաթից ավել է դասապրոցեսին, միջանկյալ քննություններին չեն մասնակցում, հետին պլան են մղում կրթական ծրագրով նախատեսված դասաժամերը, չեն ավարտելու համալսարանը: Ավելի կոնկրետ՝ նույն կուրսում են մնալու:

Նվազագույն աշխատավարձի 13 հազար դրամ բարձրացում նախատեսող օրինագծի ընդունումից հետո, այսօր խորհրդարանը սկսել է քննարկել աշխատանքային օրենսգրքում փոփոխություն անելու ԲՀԿ-ական Գեւորգ Պետրոսյանի նախաձեռնությունը: Իմ քայլական պատգամավորները գովել են Պետրոսյանին, ասել՝՝ նորմալ օրինագիծ է բերել վերջապես:

Հայաստանի ֆուտբոլի հավաքականը իր պատմության ամենախոշոր հաշվով պարտությունն է կրել: Երեկ, Իտալական Պալերմո քաղաքի Ռենցո Բարբերա մարզադաշտում մեր ֆուտբոլի ազգային հավաքականը պարտվել է իտալացի ֆուտբոլիստներին 9:1 հաշվով: Սոցցանցերում դժգոհ երկրպագուները առաջին հերթին մեղադրում են գլխավոր մարզչին, որը, ի դեպ, նոր է նշանակվել այդ պաշտոնում: Ֆեդերացիայի գործկոմի անդամն էլ, որ որպես թիվ 1 մեղավոր ֆեդերացիայի նախագահ Արթուր Վանեցյանին է ակնարկել:

Ինչպես է ստացվել, որ ըստ երկրի վարչապետի աշխատատեղերն ավելացել են, իսկ Զինծառայողների ապահովագրության կամ ինչպես ասում են 1000 դրամների հիմնադրամում դա ոչ մի կերպ չեն տեսնում: Մոտ 800 մլն-ի առեղծվածային անհետացման մասին, այս հիմնադրամի հոգաբարձուների խորհրդի անդամները ահազանգում են արդեն մի քանի ամիս, բայց միայն մի քանի օր առաջ են պարզաբանում ստացել կառավարությունից: Թե ինչ են ասել խորհրդի անդամ, պատգամավոր Տիգրան Ուլիխանյանն է հանրայնացրել:

Իսկ այժմ կրթության նախարարության մեկ այլ աղմկահարույց առաջարկի մասին, ըստ որի հայ եկեղեցու պատմություն առարկան պետք է դուրս գա դպրոցական դասացուցակից: Ասում են՝ այն պետք է դասավանդվի, որպես Հայոց պատմության մի մաս: Ու մինչ հասարակությունը փորձում է հասկանալ՝ լավ, թե վատ բան է մտածել նախարարությունը, իշխող թիմի ներկայացուցիչների որոշ հայտարարություններ գրգռում են Քրիստոնյա Հայաստանի նյարդերը: Եկեղեցիներում քննարկում ու չեն հավատում, թե պատգամավոր Հովիկ Աղազարյանը ասել է, թե ամաչում է, որ իր 7 տարեկան թոռնիկը աղոթում է ու խաչակնքվում:

Այսօր առավոտից ԵՊՀ-ի Բանասիրական ֆակուլտետում կրկին դասադուլ էր: Նախարար Արայիկ Հարությունյանի հանդիպումը դասախոսների հետ կրակի վրա յուղ է լցրել: Նախարարը դիմելով դասախոսներից մեկին՝ ՀՅԴ Գերագույն մարմնի ներկայացուցիչ Իշխան Սաղաթելյանի հորաքրոջը նորից սպառնացել էր, որ դաշնակցությունը արկղերով քրեական գործեր է ստանալու: Սաղաթելայնը ֆեյսբուքյան գրառմամբ դատապարտել է նախարարի պահվածքը եւ քաղաքական ցավոտ ապտակ խոստացել:

Հարևան Վրաստանում բողոքի ալիքը չի մարում: «Ամոթ է» անունը ստացած շարժման ներկայացուցիչները խորհրդարանի շենքի առջեւ պայքարում են, որ երկիրը անցնի 100 տոկոսանոց համամասնական ընտրակարգի: Քաղաքական մեծամասնությունը խոստացել էր հրաժարվել գործող խառը ընտրակարգից, սակայն վերջին պահին հետ էր կանգնել իր իսկ մտադրությունից:

Այսօր ավարտվեց Քոչարյանի և մյուսների գործով` հերթական դատական նիստը: Դատավոր Աննա Դանիբեկյանը որոշեց մերժել երկրորդ նախագահի պաշտպանների միջնորդությունը մեղադրող դատախազ Պետրոս Պետրոսյանին բացարկ հայտնելու վերաբերյալ։ Երկրորդ նախագահի փաստաբանները դատախազին մեղադրում են գործի նյութերի մի մասը հաշվի չառնելով իրականությունը խեղաթյուրելու, և ամեն գնով Քոչարյանի մեղադրանքը պաշտպանելու համար: Հաջորդ դատական նիստը նոյեմբերի 26-ին է:

Մանվել Գրիգորյանը կմնա կալանավորված: Դատարանն այսօր որոշեց հերթական անգամ մերժել նրա պաշտպանների միջնորդությունը Գրիգորյանին գրավի դիմաց ազատ արձակելու մասին: Այսօր դատարանի դահլիճում Գրիգորյանը մնացել է ընդամենը մի քանի րոպե: Նրա , առողջական վիճակը կտրուկ վատացել է: