Լրահոս

Երբևէ ավանակի կաթից պատրաստված օճառով լվացված կա՞ք: Արցախցի իմ գործընկեր Ծովինար Բարխուդարյանը փորձել է նորարական կոսմետիկան ու շատ գոհ է:

Նոր Հայաստանում, ինչպես Օրուելի Օկեանիայում: Նորալեզուն սոց. ցանցերից մտել է մեր կյանք ու պարտադրում է իր կանոնները:

Եթե վարչապետը հայտարարում է, որ Մել Դալուզյանն իր անձնական պաշտպանության ներքո է, ապա արդյոք պաշտպանող մեջք ունեն նաև այն 260 երեխաները, որ երկու շաբաթից գիշերօթիկից դուրս կգան ու տուն կգնան, եթե իհարկե ունեն գնալու տուն:

Ամենասատանայական մտքերը կարելի է անցկացնել Օվերտոնի հայտնի պատուհանով: Իոսիֆ Օվերտոնը այն մարդն է, որ ստեղծել է հիմնախնդիրների մասին հանրային կարծիքը ձևափոխելու մոդելը: Ըստ դրա անգամ մարդակերությունը հնարավոր է դարձնել սովորական;

Այս շաբաթվա լրահոսի ամենացնցող լուրերից մեկն էլ ազգային անվտանգության ծառայությունից ստացանք: Մանկաբարձական հաստատությունների մի շարք ծառայողներ կազմակերպել են, որ 3 տասնյակից ավելի երեխաների որդեգրեն Իտալիայի քաղաքացիները:

Փարիզում մետրոյի ավելի քան երկու տասնյակ կայարան ու էլեկտրական գնացքների ցանցն այսօր վաղ առավոտից փակ են «դեղին ժիլետների» բողոքի ակցիայի պատճառով: Ֆրանսիայի փողոցները դեղին ներկած ակցիաները սկսվեցին ուղիղ մեկ տարի առաջ բենզինի թանկացման առիթով ու դարձան պատճառ նախագահ Մակրոնի հրաժարականի պահանջի համար:

Իսկ այժմ եկող տարվա բյուջեի նախագծի մասին, որ այդպես էլ չհասկացանք հեղափոխական է, թե պահպանողական: 2020-ի ֆինանսական գլխավոր փաստաթուղթը խորհրդարանում քննարկվեց ամենևին ոչ լեփլեցուն դահլիճում: Դա այն դեպքում երբ բոլորիս գոնե հայտարարություններով պատրաստում են տնտեսական թռիչքի:

Ու վերջում մի լուսավոր պատմություն Հակոբյանների ընտանիքից: Այս շաբաթ ծնվել է նրանց 11-րդ երեխան: Ամուսինները դեռ վաղուց էին որոշել ամենաքիչը 10 երեխա են ունենալու, հիմա արդեն հստակ գիտեն 12-րդ երեխան էլ կունենան, որ թիվը աստվածաշնչյան առաքյալներին հավասարվի:

Իշխանափոխությունից ընդամենը մեկուկես տարի անց մեծ ժողովրդականությամբ հպարտացող իշխանությանը, ընդդիմադիր բևեռներ են ուրվագծվում: Վերնատուն ակումբում, որ այս շաբաթ առաջին համագումարն արեց, հավաքվել են ավագ ու երիտասարդ սերնդի հասարական-քաղաքական այն գործիչները, որ համոզված են Հայաստանը այսպես բզկտված այլևս չի կարող մնալ: Հանրային, ազգային համերաշխության կոչ անող Վերնատունը վերկուսակցական ակումբ է բայց ակումբի հիմնադիր, Հայաստանի առաջին վարչապետ Վազգեն Մանուկյանը արդեն հայտարարել է գարնանը ակտիվ քաղաքական պայքար է սկսում:

Որպեսզի երիտասարդները չմոռանան հերոսներին... Արցախի ազատության համար զոհված Ռուբիկ Կարապետյանի հուշանկյունն են բացել նրա հարազատներն ու ընկերները: Ազատամարտիկը զորհվել է հենց իր ծննդյան օրը:

Այսօր ապրիլյան պատերազմում զոհված, Արցախի հերոս Ռոբերտ Աբաջյանի ծննդյան օրն է: Նա կդառնար 23 տարեկան: Ռոբերտի հարազատներն ու ընկերները այցելել են Եռաբլուր, այնուհետև՝ հերոսի անվան դպրոց: Ապրիլյան պատերազմի օրերին 19-ամյա կրտսեր սերժանտի հերոսությունը ապշեցրել էր գրեթե բոլորին: Նկատելով մոտեցող թշնամուն, դիրքում միայնակ մնացած Աբաջյանը, վերջին անգամ կապի է դուրս եկել և ասել, որ իր մոտ մնացել է մեկ նռնակ, որով իր հետ միասին պայթեցնելու է դիրքը գրավել փորձող հակառակորդին:

«2020թ. բյուջեն հեղափոխական է»այսօր հայտարարել է վարչապետ Նիկոլ Փաշինյանը, որ մի քանի օր առաջ այն անվանել էր պահպանողական: Վարչապետը նաև քննադատել է այն ուժերին, որ եկող տարվա ֆինանսական փաստաթուղթը պահպանողական են համարում ու աբսուրդ տնտեսական հեղափոխություն հայտարարած կառավարության համար:

Երեկոյան կրթության նախարարության մոտ ասուլիս են կազմակերպել նախարար Արայիկ Հարությունյանի հրաժարականը պահանջող երիտասարդները: Այսօր նրանց միացել է Բարգավաճ Հայաստանից պատգամավորներ Արման Աբովյանն ու Գևորգ Պետրոսյանը: