Լրահոս

«Ժողովուրդ» օրաթերթը գրում է. «Փետրվարի 24-ին Զինված Ուժերի Գլխավոր շտաբում պաշտոնից ազատվեցին մի շարք պաշտոնատար անձինքեւ նրանց փոխարեն նշանակվեցին նոր պաշտոնյաներ: Սակայն արդեն երրորդ օրն է, ինչ Զինված ուժերը Գլխավոր շտաբի պետ չունեն եւ «Ժողովուրդ» օրաթերթի տեղեկություններով, այս հանգամանքը պայմանավորված է նրանով, որ թեկնածուի հարցում նախ չկա վերջնական որոշում, իսկ ՀՀ Պաշատպանության նախարար Սուրեն Պապիկյանն էլ գտնվում է Ռուսաստանի Դաշնությունում: Այսօր նախարարը կվերադառնա եւ նրա վերադառնալուց հետո արդեն կնշանակվի ԳՇ պետի ժամանակավոր պաշտոնակատար: Ի դեպ, ըստ լուրերի, նրա հետ Ռուսաստան է գնացել նաեւ ՀՀ ԶՈւ գլխավոր շտաբի պետի տեղակալ Առաքել Մարտիկյանը, ուստի չի բացառվում, որ նրա նշանակման հարցը եւս համաձայնեցվել է ՌԴ ՊՆ ղեկավար կազմի հետ: Հիշեցնենք, որ ArmLur.am-ի տեղեկությունների համաձայն՝ փետրվարի 24-ին ՊՆ-ում թեժ քննարկվում է եղել Զինված Ուժերի գլխավոր շտաբի պետի ժամանակավոր պաշտոնակատարի նշանակման հարցը: Ըստ մեզ հասած տեղեկությունների՝ երկու թեկնածուի նշանակման հարց է առաջ քաշվել՝ ԶՈւ Գլխավոր շտաբի պետի տեղակալ Կամո Քոչունցի եւ Առաքել Մարտիկյանի: Սակայն, ինչպես նշեցինք, դեռեւս որոշում չկա, թե նրանցից ով կնշանակվի ԶՈւ Գլխավոր շտաբի պետի ժամանակավոր պաշտոնակատար»:

Աբխազիայի նախագահ Ասլան Բժանիան ստորագրել է համապատասխան հրաման ԼԺՀ-ի ու ԴԺՀ-ի անկախությունը ճանաչելու մասին: Այդ մասին նշված է Բժանիայի հայրենակիցներին ուղղված ուղերձում, որը հրապարակվել է նախագահի պաշտոնական կայքում, հաղորդում է «Էխո Մոսկվին»: Նախագահը նաեւ ելույթ է ունեցել պետական հեռուստատեսության եթերում: Նա վստահություն է հայտնել, որ Աբխազիայի ամբողջ բնակչությունը սատարում է այդ որոշումը:

«Հրապարակ» թերթը գրում է. «Լոս Անջելեսի գլխավոր հյուպատոս Արմեն Բայբուրդյանի հետկանչի վերաբերյալ տեւական ժամանակ շրջանառվող լուրերը կարծես իրականություն են դառնում։ Լոս Անջելեսից տեղեկացանք, որ հյուպատոսը երեկ հրաժեշտի միջոցառում է կազմակերպել, այսօր էլ պատրաստվում է մամուլի ասուլիսով հանդես գալ։ Բայբուրդյանն այդ պաշտոնում նշանակվել է 2018-ի սեպտեմբերին։ Նա 2004-2008 թթ. զբաղեցրել է ՀՀ արտգործնախարարի տեղակալի պաշտոնը: Իսկ 2008 թ. փետրվարին ՀՀ նախագահի հրամանագրով ազատվել է պաշտոնից՝ «դեսպանների ուղերձը» ստորագրելու համար, որով իրենց բողոքն էին հայտնում իշխանությունների դեմ եւ աջակցություն հայտնում ընդդիմությանը։ Բայբուրդյանը փորձառու դիվանագետ է, ըստ որոշ լուրերի՝ նրա հետկանչին նպաստել է տեղի ՀՅԴ-ն (գուցե՝ ՀՅԴ-ից առանձնացած խմբակը), որը համարում է, որ պատերազմի ժամանակ եւ դրանից հետո հյուպատոսը պասիվ է եղել»:

Մեծ Բրիտանիան շատ շուտով պատժամիջոցներ կսահմանի Ռուսաստանի նախագահ Վլադիմիր Պուտինի և ՌԴ ԱԳ նախարար Սերգեյ Լավրովի նկատմամբ։ Այս մասին ասված է ուրբաթ օրը Մեծ Բրիտանիայի վարչապետ Բորիս Ջոնսոնի՝ ՆԱՏՕ-ի ղեկավարների հետ նրա հեռախոսազրույցից հետո տարածված հայտարարության մեջ։ «Վարչապետը ՆԱՏՕ-ի ղեկավարներին կոչ է արել անհապաղ միջոցներ ձեռնարկել Ռուսաստանում SWIFT վճարային համակարգի օգտագործման դեմ»,- ասել է Ջոնսոնը։ Նրա խոսքով՝ Լոնդոնը «շատ շուտով պատժամիջոցներ կսահմանի նախագահ Պուտինի և արտգործնախարար Սերգեյ Լավրովի դեմ՝ ի լրումն պատժամիջոցների փաթեթի, որը Մեծ Բրիտանիան հայտարարել է նախօրեին»։ Թե կոնկրետ ինչպիսին են լինելու խստացումները, չի նշվում։ Միաժամանակ բրիտանական կառավարության ղեկավարը Ուկրաինայում հատուկ գործողության պայմաններում հայտարարել է Ռուսաստանի հետ հարաբերությունների կարգավորման անհնարինության մասին։ «Ջոնսոնը հավելել է, որ Ռուսաստանի գործողություններից հետո հարաբերությունների կարգավորում չի կարող լինել»,- ասվում է հայտարարության մեջ։ Այսպիսով, ՆԱՏՕ-ի առաջնորդների հետ զրույցում նա ասել է, որ «աղետը կուլ է տալիս Ուկրաինան», և որ դա «եվրաատլանտյան ճգնաժամ է՝ գլոբալ հետևանքներով»։ Ջոնսոնը խոսել է նաև ՆԱՏՕ-ի արևելյան սահմաններն ամրապնդելու Լոնդոնի առաջարկի մասին և վստահեցրել, որ «Մեծ Բրիտանիան պատրաստ է Եվրոպայում ՆԱՏՕ-ի միացյալ ռազմական ուժերի գերագույն գլխավոր հրամանատարի ցանկացած նոր դիմումի՝ բրիտանական զինված ուժերի կողմից ՆԱՏՕ-ին ռազմական օգնություն տրամադրելու վերաբերյալ», - հայտնում են կառավարության ղեկավարի գրասենյակից։ «ՆԱՏՕ-ն պետք է առաջատար դեր ստանձնի եվրոպական անվտանգության ապագայի հարցում, և կենսական նշանակություն ունի, որ այն այժմ ամրապնդվի», - հավելել է Ջոնսոնը։ ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է Մեծ Բրիտանիայի կողմից Պուտինի և Լավրովի դեմ պատժամիջոցներ սահմանելու վերաբերյալ հայտարարությանը։ «Ո՛չ Պուտինը, ո՛չ Լավրովը հաշիվներ չունեն Բրիտանիայում կամ արտասահմանում գտնվող որևէ այլ վայրում։ Գուցե Թագավորության կառավարությունը ոչ թե սառեցրել է, այլ «հալեցրել» է ինչ-որ բան»,-Telegram-ում գրել է Զախարովան։

Ուկրաինան հրաժարվել է բանակցություններ անցկացնել Ռուսաստանի հետ։ Այդ մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։ «Ուկրաինական կողմը հրաժարվել է բանակցություններ վարել։ Կիևի ռեժիմի ներկայացուցիչներն առաջարկել են այդ հարցը քննարկել վաղը»,- նշել է Զախարովան։

Զինվորականները քաղաք են մտել ուրբաթ երեկոյան Ազովի շրջանում (Ուկրաինա) ծովային դեսանտի վայրէջքից հետո։ Նրանց դիմավորել են Մելիտոպոլի բնակիչները, իսկ որոշ տարեց քաղաքացիներ կարմիր դրոշներով փողոց են դուրս եկել, նշված է ՌԴ ՊՆ հաղորդագրության մեջ ։

«Հրապարակ» թերթը գրում է. «Ռուս-ուկրաինական հակամարտության վերաբերյալ «Քաղաքացիական պայմանագիր» կուսակցության պատգամավորներին հրահանգվել է սադրիչ եւ կողմնապահ կարծիքներ չհայտնել, հնարավորինս լռել, մինչեւ վերեւներից չհրահանգեն՝ ինչ ասել եւ ինչպես։ Սակայն այս օրերին բավականին դրամատիկ քննարկումներ են ընթանում իշխող թիմում, ներքին խոսակցություններից մեզ պատմեցին, որ ՔՊ-ում անհույս լավատես են եւ վստահ, որ շուտով Բայդենը հանգուցալուծելու է պատերազմը՝ հօգուտ Ուկրաինայի։ Եվ ինչպես 44-օրյա պատերազմից հետո էին շունչները պահած սպասում Բայդենի՝ իշխանության գալուն եւ մեր փրկությունը տեսնում էին ԱՄՆ նախագահի ձեռքում, այնպես էլ այսօր կարծում են, որ ամեն ինչ ԱՄՆ-ն է որոշում։ Սակայն թիմին խիստ զգուշացվել է, որ Ռուսաստանի հասցեին որեւէ թթու խոսք չասվի»:

Ռուսաստանի և Ադրբեջանի դաշնակցային համագործակցության շուրջ համաձայնությունը ոչ մի կերպ չի ազդի ՀԱՊԿ-ի և երկկողմանի համաձայնագրերի շրջանակներում Հայաստանի հանդեպ Ռուսաստանի պարտավորությունների վրա։ Այս մասին ճեպազրույցի ժամանակ հայտարարել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան։ «Մենք համարում ենք, որ այս փաստաթուղթը՝ հռչակագրի ստորագրումը, ոչ մի կերպ որևէ խնդիր չի ստեղծում Հայաստանի հետ Ռուսաստանի դաշինքի համար որևէ ուղղությամբ։ Մենք կկատարենք մեր բոլոր երկկողմ պարտավորությունները Երևանի նկատմամբ, որը մեր վաղեմի և մերձավոր դաշնակիցն է»,- ասել է Զախարովան։ Նա նշել է, որ Բաքվի հետ նշված հռչակագրի ստորագրումը թույլ կտա ամրապնդել Հայաստանի, Ադրբեջանի և Ռուսաստանի միջև եռակողմ համագործակցությունը, այդ թվում՝ անվտանգության, Անդրկովկասում տնտեսական և հումանիտար համագործակցության հարցերում։ «Ավելին, մենք մշտապես թարմացնում ենք Հայաստանի հետ երկկողմ օրենսդրական դաշտը, որը ներկայումս ներառում է շուրջ 200 փաստաթուղթ, այդ թվում՝ հաշվի առնելով տարածաշրջանում փոփոխված աշխարհաքաղաքական իրողությունները»,- հավելել է Զախարովան։

«Հրապարակ» թերթը գրում է. «Երեւանի քաղաքապետարանը թաղապետերի փոփոխություններ է սկսում, տեղեկություններ կան, որ Աջափնյակի թաղապետի պաշտոնում դիտարկում են ԱԺ ՔՊ-ական պատգամավոր Հովիկ Աղազարյանի կրտսեր որդու՝ Հովսեփի թեկնածությունը, որն անցած տարի հունիսին նշանակվեց թաղապետի տեղակալ։ Երեկ Աղազարյանը մեր լրագրողին ասել է, որ չի խառնվում որդու գործերին եւ տեղեկություն չունի այդ մասին։ Որդու փոխթաղապետ նշանակվելու առիթով էլ էր նա գրեթե նույնն ասել, որ որդին 2017-ից ՔՊ-ի ակտիվ անդամ է, աշխատել է թաղապետարանի իրավաբանական բաժնում, ղեկավարությունը ճանաչում է նրան»:

Փետրվարի 25-ին՝ ժամը 15:52-ին, Արարատի մարզային ճգնաժամային կառավարման կենտրոն ահազանգ է ստացվել, որ Հայանիստ գյուղի դպրոցի մոտակայքում այրվում է խոտածածկ տարածք: Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ: Պարզվել է, որ հրդեհը բռնկվել է 25-րդ փողոցի տներից մեկի հողատարածքում: Հրդեհը մեկուսացվել է ժամը 16:40-ին, մարվել՝ 16:45-ին։ Այրվել են «Lada Priora» մակնիշի ավտոմեքենա, չշահագործվող ավտոմեքենայի թափք և մոտ 2500 քմ խոտածածկույթ:

Հայաստանի վարչապետի հրաժարականի պահանջով Հայաստանում ստորագրահավաք է սկսվել: Դրան կարող են միանալ նաև արտերկրում ապրող հայերը: Ստորագրահավաքի մեկնարկի մասին հայտարարվել է այսօր Եռաբլուրում:

Դաշինքը մտադիր է շարունակել Ուկրաինային արևմտյան սպառազինությունների մատակարարումը, ներառյալ հակաօդային պաշտպանության համակարգերը, հայտարարել է ՆԱՏՕ-ի գլխավոր քարտուղար Յենս Ստոլտենբերգը արտակարգ առցանց գագաթնաժողովից հետո հրավիրված մամուլի ասուլիսի ժամանակ, հայտնում է Reuters-ը։ «Կրեմլի նպատակները միայն Ուկրաինայով չեն սահմանափակվում։ Ռուսաստանը օրինական համաձայնություն է խնդրել ՆԱՏՕ-ի ընդլայնումից հրաժարվելու և զորքերը 1997-ի դիրքեր դուրս բերելու համար»,- ասել է Ստոլտենբերգը՝ մեկնաբանելով ապագա զենքի և ռազմական տեխնիկայի մատակարարումների որոշումը։

Ռուս-ուկրաինական պատերազմի ֆոնին տարածաշրջանում վտանգված է տնտեսական մթնոլորտը: Այս հարցում ԵԱՏՄ պետությունների ղեկավարները համակարծիք են: Տնտեսագետները վստահ են՝ Ռուսաստանի դեմ պատժամիջոցների հետևանքով ստեղծված տնտեսական շոկը կհասնի նաև Հայաստան:

Տնտեսական համագործակցության և զարգացման կազմակերպությանը Ռուսաստանի անդամակցության շուրջ բանակցությունները, որոնք դադարեցվել էին 2014 թվականից, վերջնականապես դադարեցվել են։ Այս մասին ասվում է ՏՀԶԿ-ի մամուլի հաղորդագրության մեջ։ Կազմակերպությունն այս որոշման պատճառ է անվանել «Ռուսաստանի լայնածավալ ագրեսիան Ուկրաինայի դեմ»։ ՏՀԶԿ-ն խոստացել է այլ քայլեր ձեռնարկել Ռուսաստանի հետ հարաբերությունները վերանայելու համար։ Մասնավորապես, կազմակերպության մոսկովյան գրասենյակը կփակվի, Ռուսաստանն այլևս ՏՀԶԿ նախարարների հանդիպումների հրավերներ չի ստանա։

«Միայնակ մնացած Ուկրաինային ՆԱՏՕ-ն պետք է ավելի գործուն աջակցի»,- Հյուսիսատլանտյան դաշինքի մեծությամբ երկրորդ բանակն ունեցող Թուրքիայի նախագահն է այսօր հայտարարել՝ լավ չէ, որ Արևմուտքը միայն խորհուրդներ է տալիս Ուկրաինային:

Ուկրաինայի մետրոյի կայարանները երկրորդ օրն է՝ լիքն են մարդկանցով, որ իրենց հետ ապաստարան են տարել ճամպրուկներ, մանկասայլակներ, ընտանի կենդանիներ: Ասում են՝ մետրոյում ավելի հանգիստ են, քան տներում, որոնք ամեն վայրկյան կարող են ռմբակոծվել:

Ըստ ռուսական կողմի, ուկրաինացի ազգայնականները կամուրջներ են պայթեցնում, որպեսզի Ուկրաինայի զորքը չկարողանա նահանջել: Ըստ պաշտոնական Կիևի՝ այս պահին ամենամեծ վտանգը Կիևի հյուսիս-արևմուտքում է՝ Դիմեր-Իվանկով հատվածում, որտեղով, ըստ ուկրաինացիների, անցած գիշեր փորձել է Կիև մտնել ռուսական տանկային շարասյունը:

Ռուսաստանի նախագահը վստահ է՝ Ռուսական զորքը կռվում է ոչ թե կանոնավոր բանակի դեմ, այլ նեոնացիստական խմբավորումների, որոնց մեջ թմրամոլներ կան, և եթե ուկրաինական բանակը իր ձեռքն առնի իշխանությունը, բանակցություններն ավելի հեշտ կլինեն:

Վլադիմիր Պուտինը անվտանգության խորհրդի նիստում ուկրաինացի զինվորականներին կոչ է արել՝ իշխանությունն իրենց ձեռքը վերցնել և չթույլատրել, որ ազգայնականները մարդկանց օգտագործեն որպես կենդանի վահան: