Լրահոս

Ռուսաստանի արտգործնախարար Սերգեյ Լավրովը Հյուսիսատլանտյան դաշինքին է մեղադրել Ուկրաինայի ագրեսիվ պահվածքը ողջունելու համար, որի պատճառով էլ Կիևը փորձում է ռազմական ճանապարհով լուծել քաղաքական հարցերը: Լավրովը Սթոքհոլմում ԵԱՀԿ երկրների արտգործնախարարների հավաքի ժամանակ հայտարարել է, որ Միացյալ Նահանգները պատրաստվում է ամերիկյան հրթիռներ ուղարկել Եվրոպա՝ փորձելով ռազմականացնել Ռուսաստանի սահմանները:

Ոստիկանության սպա Սայաթ Շիրինյանի նկատմամբ ընտրված խափանման միջոց ստորագրությունը դատարանն այսօր վերացրել է: Գործը մտել է դատաքննության փուլ:

Ադրբեջանական մամուլը մանրամասներ է հրապարակել Հորադիզ-Աղբենդ երկաթգծի շինարարության մասին: Ըստ հաղորդագրությունների՝ Բաքուն մտադիր է հաջորդ տարի ավարտել 110 կմ երկաթգծի կառուցումը:

Փետրվարից հոսանքը կթանկանա: Մասնագետները նկատում են, որ Հայաստանում հոսանք քիչ է արտադրվում: Հնարավոր է ներկրման հարց առաջանա:

Ըստ վիճակագրական ծառայության՝ 600-700-ով ավելի շատ մարդ է մահացել թագավարակից: ՊՎԾ-ն կորոնավիրուսից մահացածների թվի ճշգրտման համար ստուգումներ է սկսել:

ՆԱՏՕ-Ռուսաստան հարաբերությունները հասել են մի կետի, երբ միմյանց հասցեին փոխադարձ սպառնալքներ են հնչում: Հայ փորձագետները նկատում են, որ Ուկրաինան ՆԱՏՕ-ի համար միայն ռազմավարական գործընկեր չէ: Ըստ քաղաքագետ Ալեն Ղեւոնդյանի՝ Զելենսկին երկրի ինքնիշխանությունը հանձնել է Արևմտյան ուժերին:

Ադրբեջանի նախագահի օգնական Հիքմեթ Հաջիևը հայտարարել է, թե պաշտոնական Բաքուն պատարստ է խաղաղության համաձայնագրի շուրջ բանակցություններ սկսել Երևանի հետ: Միևնույն ժամանակ պաշտոնական Երևանից տեղեկացնում են, որ Մոսկվայում՝ փոխվարչապետների եռակողմ աշխատանքային խմբին չի հաջողվել համաձայնության հասնել:

Սուրբ Գրիգոր Լուսավորիչ Մայր եկեղեցում տեղի է ունեցել «Ցորի» զորամասի 9 զինծառայողի հոգեհանգստի արարողությունը: Ավելի քան մեկ տարվա անհայտությունից հետո 11 հրետանավորների աճյունները Ադրբեջանը հայկական կողմին էր հանձնել այս տարվա նոյեմբերի 2-ին:

«Ձայն հայրենյաց» նախաձեռնության անդամներն ու բազմաթիվ հասարակական, քաղաքական, մշակութային գործիչներ պահանջում են ազատ արձակել «Սիսական» ջոկատի հրամանատար, գնդապետ Աշոտ Մինասյանին՝ «Աշոտ երկաթ»-ին։

Նոր տարին՝ նոր տարիֆով: Յուքոմն իր հաճախորդների ու բաժանորդների համար նոր առաջարկներ ունի: «Յունիթի» տարիֆը կոնվերգենտ ծառայություն է՝ ամեն ինչ մեկ տեղում։

Ըստ տնտեսագետների, Թուրքիայից ապրանքները մտնում են Վրաստան, այնտեղից անարգել Հայաստան հասնում: Եթե հագուստը արգելված է, ապա հումք կամ սարքավորում Թուրքիայից բերել թույլատրվում է:

Խաչատուր Սուքիասյանի եղբոր նկատմամբ երկրորդ անգամ գրավ է կիրառվել: Դատարանը բավարարել է Ռոբերտ Սուքիասյանի խափանման միջոց կալանքը 55 մլն. դրամ գրավով փոխարինելու պաշտպանների միջնորդությունը:

Սյունիքի ճանապարհներին ադրբեջանական մաքսակետերից բացի նաև հայկականները կլինեն: Հայ մաքսավորներն արդեն կանգնած են, այսպիսի հայտարարություն է արել ՊԵԿ նախագահ Ռուստամ Բադասյանը: Նրա խոսքով մաքսավորները դեռ ուրիշ շինություններում են մնում, մինչև պայմաններ կստեղծվեն, բայց մինչև հիմա ոչ մի ադրբեջանական մեքենա հայկական մաքսավորների առաջով չի անցել:

Փոթորկից ուշքի չեկող Թուրքիային հիմա էլ ջրհեղեղի վտանգն է սպառնում: Օդերևութաբանները սաստիկ տեղումներ են կանխատեսել: Իսկ փոթորկի զոհերի թիվը հասել է 7-ի, վիրավորները 6 տասնյակից ավելի են: Ափամերձ շրջաններում տասնյակ նավեր են խորտակվել:

Հենց այս պահին՝ թշնամու ուղիղ նշանառության տակ է նաև Կապան-Ճակատենի այլընտրանքային ճանապարհը: Ճանապարհի մոտ 6 գյուղ կա: Բնակիչները վախենում են, որ նորից 90-ականները կվերադառնան, երբ ադրբեջանցիները կարողանում էին դիպուկահարի կրակոցներով թիրախավորել մարդկանց:

Թուրքիան կարող է դառնալ երկրորդ երկիրը՝ Ադրբեջանից հետո, որի դեմ Եվրոպական խորհրդարանի որոշումը խախտելու գործով հայց կներկայացվի: Եվրոպական խորհրդարանը պատրաստվում է պատժամիջոցներ սահմանել Թուրքիայի նկատմամբ՝ ընդդիմադիր գործիչ Օսման Քավալային 4 տարի կալանքի տակ պահելու համար:

Արցախի դատախազությունը Ազգային անվտանգության ծառայություն է ուղարկել ոմն Ռոման Բաղդասարյանի մի բլոգերական տեսանյութ, որում նա հայտարարում է, թե Նիկոլ Փաշինյանին արատավորելու համար արցախցի գեներալները 200 զինվոր են սպանել: Արցախի դատախազությունը չի բացատրում՝ ինչո՞ւ է միլիոնավոր լայվերից հենց այդ մեկը հանագործության մասին հաղորդման կասկած առաջացրել: Հայտնի է, որ Ռոման Բաղդասարյանը «Քաղաքացիական պայմանագրի» ակտիվիստ է։ Բայց, ասում են, ՔՊ-ականների նախընտրական շտաբում վազվզելուց ազատ ժամերին նա նաև Հայաստանի և Արցախի հայերի միջև ատելություն սերմանող կոչեր է անում:

ՔՊ-ական Արամ Մելքոնյանի հետ համայնքապետի տեղի համար նախընտրական մրցավազքի մեջ է մտել Միասնական Վարդենիսը ներկայացնող Արամ Հարությունյանը: Պնդում է, որ սկանդալներով ու աղմուկով խոշորացված Վարդենիսը չի կարող մնալ ՔՊ-ականի ձեռքում: Նրա հետ անգամ նախընտրական բանավեճի չի մասնակցել: Ասելիք չունի մի մարդու, որ, իր պնդմամբ, չի զբաղվում համայնքի ամենակարևոր՝ անվտանգային խնդիրներով: