Լրահոս

Ռուս-ուկրաինական պատերազմի տնտեսական հետևանքները հասել են Հայաստան: Արևածաղկի բուսայուղի դեֆիցիտ է: Ձեթը, որ հիմնականում Ռուսաստանից է գալիս Հայաստան, արդեն թանկացել է: Բայց մարդիկ կրում-տանում են: Իհարկե, մեզ մոտ վիճակը դեռ այնքան վատ չէ, որքան, օրինակ, Իսպանիայում: Այդ երկրի սուպերմարկետներում ստիպված ձեթ վաճառելու սահմանափակումներ են մտցրել: Մեկ քաղաքացուն թույլատրվում է վաճառել ոչ ավելի քան հինգ լիտր ձեթ:

Ուկրաինայի նախագահ Վլադիմիր Զելենսկին BILD պաբերականին տված հարցազրույցում հայտարարել է, որ հակամարտությունը կարելի է լուծել ՌԴ նախագահ Վլադիմիր Պուտինի հետ երկխոսության և բանակցությունների ճանապարհով։ «Հարցն այն չէ՝ ինչի կարող ես եմ գնալ։ Ցանկցած երկխոսության պարագայում իմ նպատակն է ավարտել պատերազմը Ռուսաստանի Դաշնության հետ։ Դրա համար ես պատրաստ եմ կոնկրետ քայլերի․ պատրաստ եմ բանակցություններ վարել, փոխզիջումների գնալ, բայց դա իմ ժողովրդին դավաճանել չի նշանակի, մյուս կողմն էլ պետք է պատրաստ լինի փոխզիջումների»,- ասել է Զելենսկին։ Նրա խոսքով՝ միայն այդպես է հնարավոր կարգավորել հակամարտությունը։ «Դետալների մասին շատ բարդ է ու դեռ վաղ է խոսել։ Նախագահների միջև դեռ շփում չի եղել։ Այս պատերազմը մենք կարող ենք կանգնեցնել միայն երկու նախագահների միջև ուղիղ բանակցությունների միջոցով»,- ասել է Ուկրաինայի նախագահը։

Ուկրաինացի ազգայնականները հարված են հասցրել Չեռնոբիլի ԱԷԿ-ի էներգամատակարարումն ապահովող էլեկտրացանցային օբյեկտներին։ Տեղեկությունը ճեպազրույցի ժամանակ հայտնեց Ռուսաստանի պաշտպանության փոխնախարար Նիկոլայ Պանկովը։ Նրա խոսքով՝ դա նպատակաուղղված սադրանք է։ Ռուս մասնագետները օպերատիվ միջոցներ են ձեռնարկել պահեստային դիզելային-գեներատորային աղբյուրներին անցնելու համար։ «Ներկայումս ուկրաինական կողմն ամեն կերպ խուսափում է որևէ վերանորոգման-վերականգնողական աշխատանքների կազմակերպելուց։ Մեր կարծիքով՝ դա ևս մեկ անգամ հաստատում է ազգայնականների գործողությունների միանգամայն նպատակային ու սադրիչ բնույթը», - նշել է Պանկովը։ Ռուսաստանի Էներգետիկայի փոխնախարար Պավել Սորոկինի խոսքով՝ «շատ կարևոր է նշել, որ արդեն այս պահին բելառուսական կողմը օպերատիվ ռեժիմով մշակել է բելառուսական էներգահամակարգից մշտական սխեմայով էներգամատակարարման վերականգնման հարցը»:

Կիևը պատրաստ է Ռուսաստանի հետ քննարկել Ուկրաինայի չեզոք կարգավիճակի հարցը՝ երկրին անվտանգության երաշխիքներ տրամադրելու պայմանով, հայտարարել է Զելենսկու գրասենյակի ղեկավարի տեղակալ Իգոր Ժովկվան՝ Bloomberg Television-ի եթերում։ «Իհարկե, մենք պատրաստ ենք խնդիրը դիվանագիտական ճանապարհով կարգավորել։ Բանակցությունների արդեն 3 փուլ է կայացել»,- ասել է նա՝ հավելելով, որ վաղը Ուկրաինայի ԱԳ նախարար Դմիտրի Կուլեբան բանակցություններ է վարելու ՌԴ ԱԳ նախարար Սերգեյ Լավրովի հետ։ «Շատ կարևոր է, որ իմ նախագահը (Վլադիմիր Զելենսկին-խմբ․) պատրաստ է ուղիղ բանակցել ՌԴ նախագահ Վլադիմիր Պուտինի հետ»,- ասել է Ժովկվան։ «Կիևը պատրաստ է քննարկել Ուկրաինայի չեզոք կարգավիճակի հարցը, եթե անվտանգության երաշխիքներ ստանա»,- ընդգծել է Զելենսկու գրասենյակի ղեկավարի տեղակալը։ Նրա խոսքով՝ այդ երաշխիքներն Ուկրաինային պետք է տրամադրի ոչ միայն Ռուսաստանի Դաշնությունը, այլև ԱՄՆ-ն, Մեծ Բրիտանիան, Գերմանիան և այլ երկրներ։

Ռազմական, հոգեբանական, տնտեսական գրոհներ է սկսել Բաքուն Արցախի դեմ: Թուրքիան ու Ադրբեջանը, ըստ փորձագետների, սպասում են, որ ռուս-ուկրաինական ճակատում վերջնական հստակություն մտնի: Մինչև դա՝ թշնամին անում է ամեն ինչ Արցախում հումանիտար ճգնաժամ առաջացնելու համար: Արցախի խորհրդարանի պատգամավորը պնդում է, որ ադրբեջանցիներն են պայթեցրել Արցախ գազ տանող խողովակը: Երկրորդ օրն է ամբողջ Արցախում գազ չկա:

Discovery ընկերությունը, որին պատկանում է նաև Eurosport հեռուստաալիքը, Ռուսաստանի տարածքում դադարեցնում է կաբելային ալիքների ցուցադրումը: Հեռարձակումը կդադարեցնեն մոտ 15 ալիքներ: Eurosport-ը Ռուսաստանում հեռարձակում էր թենիսի, դահուկային մարզաձևերի, բիաթլոնի, հեծանվասպորտի, սնուքերի և այլ մարզաձևերի մրցաշարերը: © shamshyan.com https://shamshyan.com/hy/article/2022/03/09/1208598/

Արցախի դատախազությունը հայտնում է, որ Ադրբեջանական կողմը տարբեր տրամաչափի զինատեսակներից, այդ թվում ականանետերից ակտիվ կրակ է վարել Ասկերանի շրջանի Խրամորթ և Նախիջևանիկ, Մարտունու շրջանի Խնուշինակ և Կարմիր շուկա համայնքների ճանապարհների ուղղությամբ: Ըստ պաշտոնական հաղորդագրության՝ այդպես կասեցրել են գյուղատնտեսական աշխատանքները, խոչընդոտել բնակիչների ազատ տեղաշարժը: 44-օրյա պատերազմից հետո առաջին անգամ են ադրբեջանցիները թիրախավորել Արցախի Խնուշինակ գյուղը: Պաշտպանության բանակը հայտնում է, որ գյուղի ուղղությամբ արձակվել է 60 միլիմետրանոց 4 ական։

Հայաստանում Ուկրաինայի դեսպանությունը կարևոր տեղեկատվություն է տարածել այն ուկրաինացիների համար, ովքեր պատերազմի պատճառով ժամանել են Հայաստանի Հանրապետություն և փնտրում են բնակվելու վայր, ինչպես նաև ՀՀ այն քաղաքացիների համար, ովքեր հնարավորություն ունեն օգնելու Ուկրաինայից եկած մարդկանց անվճար տեղավորելու իրենց տներում։ «Արմենպրես»-ի փոխանցմամբ, դեսպանությունից հայտնել են, որ գործարկվել է «Ապաստարան» պաշտոնական կայքը: «Այս կայքում դուք կարող եք տեղեկատվություն տեղադրել բնակավայրերի, թափուր աշխատատեղերի քանակի և կոնտակտների մասին, որտեղ կարող եք առաջարկել կամ գտնել անվճար բնակարան:Դա հարմար և ապացուցված ծառայություն է, որն օգնում է համակարգել նրանց ջանքերը, ովքեր օգնություն են փնտրում և ովքեր կարող են այն տրամադրել: Հորդորում ենք ՀՀ քաղաքացիներին օգտվել «Ապաստարան» կայքից, եթե ցանկանում եք օգնել կանանց և երեխաներին գտնել ապաստարան, ովքեր հարկադրված են եղել գալ մեր երկիր՝ փախչելով պատերազմից»,- ասվում է դեսպանատան հայտարարության մեջ։

Բայդենը վստահ է, որ հզոր հարված է հասցնում, իր խոսքով, Պուտինի ռազմական մեքենային՝ հրաժարվելով Ռուսաստանից նավթ ներմուծել: Փորձագետները կասկածում են, թե խելամիտ են Բայդենի հաշվարկները: Ըստ նրանց՝ դաշնությունը կորցնում է արտահանման ոչ ռազմավարական ուղղություններ:

ՀՀ Վերաքննիչ քրեական դատարանում՝ դատավոր Մնացական Հարությունյանի նախագահությամբ, այսօր քննվել է ՀՀ պաշտպանության նախկին նախարար Դավիթ Տոնոյանի, զենքի մատակարարմամբ զբաղվող գործարար Դավիթ Գալստյանի (հայտնի որպես «Պատրոն Դավո»), ԶՈւ ԳՇ պետի նախկին տեղակալ Ստեփան Գալստյանի, Ավետիք Մուրադյանի նկատմամբ ընտրված խափանման միջոց կալանքը փոփոխելու մասին միջնորդությունները։ Միջնորդության քննությունը կշարունակվի վաղը՝ 15։30-ին։

Հումանիտար միջանցքների վերաբերյալ Կիևի անհեթեթ պահանջները ցույց տվեցին, որ ուկրաինական կողմից դրանց համաձայնեցման համար պատասխանատուները չեն տիրապետում իրադրությանը: Ինչպես տեղեկացնում է ՌԻԱ Նովոստին, այս մասին հայտարարել է ՌԴ պաշտպանության վարչության ազգային կենտրոնի պետ, գեներալ-գնդապետ Միխայիլ Միզինցևը։ Նա նշել է, որ ՌԴ-ն մարդասիրական նպատակներով հանդես է եկել «պաշտոնական Կիևին» ուղղված հերթական նախաձեռնությամբ՝ 10 հումանիտար միջանցք բացելու և Կիևից, Չերնիգովից, Սումիից, Խարկովից և Մարիուպոլից խաղաղ բնակչությանն ու օտարերկրյա քաղաքացիներին տարհանելու համար: Մասնավորապես առաջարկվել է յուրաքանչյուր քաղաքից դեպի Ռուսաստան տանող մեկական մարդասիրական միջանցք բացել, ինչպես նաև Կիևի իշխանությունների վերահսկողության տակ գտնվող տարածքներով՝ մեկական միջանցք դեպի Լեհաստան, Մոլդովա և Ռումինիա։ Գեներալը պարզաբանել է, որ գիշերվա ժամը 2-ին Ուկրաինայից պաշտոնական պատասխան է եկել, որում ՌԴ տարածք տարհանելու համար առաջարկված երթուղիները կտրականապես մերժվել են: Ընդամենը երեք երթուղի է համաձայնեցվել․ մեկը՝ Կիևի ուղղությամբ դեպի հարավ, ինչպես նաև Սումիից Պոլտավա և Մարիուպոլից Զապորոժիե։ Բայց նաև երեք լրացուցիչ միջանցք է առաջարկվել՝ Էներգոդար քաղաքից դեպի Զապորոժիե, Վոլնովախայից դեպի Պոկրովսկ, Իզիում քաղաքից դեպի Լոզովայա։ «Բացի այդ, ուկրաինական կողմից աբսուրդ և ակնհայտորեն անիրագործելի պահանջներ են առաջ քաշվել` երթուղիներից մեկում իրականացնել պարտադիր ականազերծում, ընդ որում ՝ ազգայնականների կողմից տեղադրված ականային պայթուցիկ սարքերի, իսկ մյուսում՝ վերականգնել նահանջի ժամանակ Ուկրաինայի զինված ուժերի կողմից ավերված ավտոմոբիլային կամուրջը։ Այդ պահանջներն անհեթեթ են նաև այն պատճառով, որ երկու երթուղիներն էլ անցնում են ազգայնական գումարտակների վերահսկողության տակ գտնվող տարածքներով»,- պարզաբանել է Միզինցևը։ Ինչպես նշել է գեներալը, հաշվի առնելով ՌԴ-ի պատասխանատվությունը հումանիտար բաղադրիչի և խաղաղ բնակիչների ու օտարերկրյա քաղաքացիների ելքի անվտանգության ապահովման համար, որոնց ազգայնականները բռնի կերպով պահում են շրջափակված բնակավայրերում, Ռուսաստանի Դաշնության պաշտպանության կառավարման ազգային կենտրոնը համաձայնել է նաև ուկրաինական կողմի առաջարկած լրացուցիչ երթուղիներին: Ռուսաստանն ու Ուկրաինան բանակցությունների երեք փուլ են անցկացրել։ Երկրորդ փուլի ընթացքում կողմերը փոխըմբռնման էին հասել քաղաքացիների տարհանման, մթերքի և դեղորայքի մատակարարման համար հումանիտար միջանցքների համատեղ ապահովման վերաբերյալ, սակայն մարդասիրական միջանցքները լիարժեք չեն գործել։

Մարտի 8-ին ԱՄՆ-ում 57 տարեկան հասակում մահացել է Դեյվիդ Բենեթը՝ աշխարհում առաջին մարդը, ում կենդանու (խոզի) սիրտ էին պատվաստել։ Ինչպես հայտնում է New York Times-ը, մահվան պատճառը դեռ հայտնի չէ, այն պարզ կլինի միայն դիահերձումից հետո։ Բենեթը, ով տառապում էր սրտի ծանր հիվանդությամբ, համաձայնել էր փորձարարական բուժման` փոխպատվաստման հերթացուցակում տեղ չգտնելուց հետո: Երկու ամիս առաջ կատարված վիրահատությունը բարեհաջող էր ացել։ Բժիշկների պնդմամբ տղամարդը հետվիրահատական ֆիզիոթերապիա էր անցնում, ժամանակ անցկացնում ընտանիքի հետ, անգամ` SuperBowl սպորտային շոու դիտում։ Սակայն մահվանը նախորդած վերջին մի քանի օրվա ընթացքում հիվանդի վիճակը սկսել էր վատանալ։ «Հուսով ենք, որ այս պատմությունը կարող է լինել հույսի սկիզբը, ոչ թե ավարտը», - սոցկայքի իր էջում գրել է հիվանդի որդին՝ Դեյվիդ Բենեթ կրտսերը։

Բելառուսի նախագահ Ալեքսանդր Լուկաշենկոն բելառուս ժողովրդի և անձամբ իր անունից շնորհավորել է Վահագն Խաչատուրյանին Հայաստանի Հանրապետության նախագահի պաշտոնում ընտրվելու կապակցությամբ: Լուկաշենկոյի ուղերձը հրապարակվել է Բելառուսի նախագահի պաշտոնական կայքում։ «Վստահ եմ, որ պետական բարձր պաշտոնում Դուք կնպաստեք տարբեր ոլորտներում Բելառուսի և Հայաստանի համագործակցության հետագա զարգացմանը, մեր ժողովուրդների միջև բարեկամության և փոխըմբռնման ամրապնդմանը», - ասված է շնորհավորական ուղերձում: Լուկաշենկոն Խաչատրյանին մաղթել է քաջառողջություն, երջանկություն և հաջողություններ պատասխանատու և կարևոր գործունեության մեջ՝ ի բարօրություն Հայաստանի քաղաքացիների:

Վաղ առավոտից Ռուսաստանը լռության ռեժիմ է հայտարարել, որպեսզի Կիևից, Չեռնիգովից, Սումիից, Խարկովից և Մարիուպոլից խաղաղ բնակիչները կարողանան մարդասիրական միջանցքով դուրս գալ: Նախորդ օրը՝ Ուկրաինայի հաստատած միակ՝ Սումի-Պոլտավա ուղղությամբ 5 հազար մարդ էր դուրս եկել ռազմական գործողությունների գոտուց: Դոնեցկի ազգային միլիցիայի ներկակայցուցիչը հայտնել է, թե մարդասիրական միջանցքները չեն գործում: Մարդիկ Մարիուպոլիս հեռանում են՝ ով ինչպես կարող է:

Արաբ ներկայացող Թայսունը (անձնագրային անունը Հայթամ Դամրայի (Haitham Damra), որն իրականում տեղի բնակիչների կասկածներով, իրականում ադրբեջանցի է, արդեն տևական ժամանակ է ապրում է ՀՀ Արարատի մարզի Սուրենավան գյուղում, մասնակցում է գյուղի ներքին կյանքին՝ հուղարկավորություններին ու խնջույքներին, Սուրենավանում հողատարածքներ է գնել, բիզնեսներ է հիմնել այստեղ,- «Փաստինֆո»-ի հետ զրույցում ասում է Արարատի մարզի Սուրենավան գյուղի բնակիչը՝ իր նկատմամբ հնարավոր ճնշումներից անհանգստանալով, չցանկացավ ներկայանալ։ Նրա փոխանցմամբ՝ իրենց գյուղում, արդեն տևական ժամանակ է, ինչ կասկածելի ազգային պատկանելությամբ հյուր ունեն։ Համայնքի բնակիչն ահազանգում է՝ թեև անձնագրային տվյալներով իրենց հյուրընկալած անհասկանալի անձն, իսկապես, արաբական երկրի գրանցում ունի, սակայն, գրեթե անհնար է համարում, որ վերջինս արաբ լինի, որովհետև գյուղացիների հետ շփվում է ընդգծված կովկասցու ռուսերենով, որին, արաբներն, ամենայն հավանականությամբ, չեն տիրապետում: «Մարդն իրեն այստեղ լավ է զգում, ասում է, որ հողատարածքներ է գնել, ծիրանի այգի և ֆերմա է ուզում բացել։ Խոսում է վարժ ռուսերենով, սակայն ընդգծված կովկասցու ակցենտով։ Այդպես կարող է խոսել միայն հայը, վրացին կամ ադրբեջանցին, բայց երևի՝ ոչ արաբը»,- նշում է Սուրենավանի բնակիչը։ Ըստ նրա՝ անհասկանալի իրավիճակ է ստեղծվել նաև Սուրենավան գյուղի «Արբիտ» ՍՊԸ-ին պատկանող նավթավերամշակման կոմբինատի շուրջ.«Ասում են՝ ինչ – որ վրացու միջոցով կոմբինատը վաճառել են ադրբեջանցիներին, իսկ գործարքի մեջ շրջանառվում է հայտնի գործարար Խաչատուր Սուքիասյանի անունը։ Մի քանի օր առաջ էլ նրա եղբայրն էր այստեղ՝ գործարանի հետ կապված ինչ - որ հարցեր էին քննարկվում»,- պատմում է Սուրենավանի բնակիչը։ Հիշեցնենք, որ «Փաստինֆո» լրատվականին ահազանգ էր հնչել այն մասին, որ ՀՀ Արարատի մարզի Սուրենավան համայնքում արաբ ներկայացող, սակայն, ամենայն հավանականությամբ, ազգությամբ ադրբեջանցի անձինք տներ և հողատարածքներ են ձեռք բերել։ Խոսվում էր նաև համայնքում գտնվող նավթավերամշակման կոմբինատի կասկածելի վաճառքի մասին, որի նոր սեփականատերերը, ըստ շրջանառվող լուրերի, կրկին ադրբեջանից են։ «Փաստինֆո» լրատվականը կապ էր հաստատել Սուրենավան համայնքի նորանշանակ ղեկավար Անի Վարդազարյանի հետ, ով ազգությամբ ադրբեջանցիների կողմից տների ձեռքբերման մասին լուրերը հերքել էր, իսկ նավթավերամշակման կոմբինատի վաճառքի վերաբերյալ հարցն անպատասխան թողնելով՝ ընդհատել էր հեռախոսազրույցն ու անջատել հեռախոսը։

«Փաստինֆո» լրատվականն ահազանգ էր ստացել այն մասին, որ Արարատի մարզի Սուրենավան համայնքում որպես արաբական երկրի քաղաքացի հանդիսացող անձինք, որոնք իրականում թուրք ու ադրբեջանցի են, տներ և հողատարածքներ են գնել, բացի այդ՝ սեփականաշնորհել Արարատի մարզի Սուրենավան գյուղի «Արբիտ» ՍՊԸ-ին պատկանող նավթավերամշակման կոմբինատը։ Տեղեկությունը ճշտելու համար, լրատվականը կապ հաստատեց համայնքի նորանշանակ ղեկավար Անի Վարդազարյանի հետ, որը հերքեց ադրբեջանցիների կողմից տներ ձեռք բերելու մասին տեղի բնակիչներից մեզ հասած տեղեկությունները, սակայն լսելով հաջորդ հարցը՝ ադրբեջանցու կողմից տեղի՝ նավթավերամշակման կոմբինատը սեփականաշնորհելու մասին՝ շտապեց անջատել հեռախոսն ու «անհասանելի» դարձավ լրագրողի զանգերին։ Ճշտելու համար լրատվամիջոցին հասած տեղեկությունների իսկությունը, «Փաստինֆո»-ն կապ հաստատեց նաև Արարատի մարզի Սուրենավան գյուղի «Արբիտ» ՍՊԸ-ին պատկանող նավթավերամշակման կոմբինատի աշխատակից Լադիկ Սարգսյանի հետ, ով վերջերս լրատվամիջոցներից մեկին տված հարցարզույցի ընթացքում հայտարարել էր, թե չի պատրաստվում աշխատել թուրքերի հետ՝ ակնարկելով, թե տեղի նավթավերամշակման կոմբինատը նոր սեփականատեր ունի, որն, ըստ իրեն հասած տեղեկությունների համաձայն, թուրքերն են։ «Փաստինֆո»-ի հետ զրույցում կոմբինատի աշխատակիցը պատմում է՝ ունի տեղեկություններ, որ Սուրենավանի նավթավերամշակման կոմբինատը վերջերս վաճառվել է վրաստանցի ինչ - որ մարդկանց, սակայն հավելում՝ համայնքում խոսակցություններ կան, որ իրական սեփականատերն Ադրբեջանից է, և այդ լուրերն են պատճառը, որ ինքը վերջերս լրատվամիջոցներից մեկին տված հարցազրույցի ընթացքում հայտարարել է, թե չի աշխատելու թուրքերի հետ։

Մարտի 9-ին ՀՀ վարչապետ Նիկոլ Փաշինյանի գլխավորած պատվիրակության կազմում Փարիզում գտնվող ԱԳ նախարար Արարատ Միրզոյանի և Ֆրանսիայի ԱԳ լիազոր նախարար Ժան-Բատիստ Լըմուանի համանախագահությամբ անցկացվել է Հայաստանի և Ֆրանսիայի միջև դիվանագիտական հարաբերությունների հաստատման 30-ամյակին նվիրված «Ֆրանսիա-Հայաստան համագործակցության հեռանկարներ» համաժողովի բացման արարողությանը: Համաժողովի մեկնարկին իր ելույթում ՀՀ ԱԳ նախարար Արարատ Միրզոյանը անդրադարձել է հայ-ֆրանսիական առանձնաշնորհյալ հարաբերությունների զարգացման հեռանկարներին՝ ընդգծելով, որ երկու ժողովուրդների միջև ձևավորված հարյուրամյակների պատմություն ունեցող ավանդական կապերը կարևոր հիմք են հանդիսացել հայ-ֆրանսիական միջպետական հարաբերությունների զարգացման համար: ՀՀ արտաքին քաղաքական գերատեսչության ղեկավարը նշել է, որ չնայած 30-ամյա հայ-ֆրանսիական հարուստ օրակարգին՝ առկա են համագործակցության ընդլայնման մեծ հնարավորություններ, մասնավորապես՝ տնտեսական, ենթակառուցվածքների, կրթական, առողջապահական, մշակութային և այլ ոլորտներում: Շեշտվել է, որ առկա է երկուստեք վճռականություն՝ Հայաստանի և Ֆրանսիայի միջև առանձնաշնորհյալ հարաբերությունների ոգով ընդլայնելու հայ-ֆրանսիական տնտեսական համագործակցությունը՝ այն համահունչ դարձնելով երկու ժողովուրդների բարեկամությանն ու բարձրաստիճան սերտ քաղաքական երկխոսության մակարդակին։

Այսօր՝ ժամը 14:15-ի սահմաններում, Երևան-Մեղրի ավտոճանապարհի 160-րդ կմ հատվածում՝ «Գանձասար» ռեստորանային համալիրի մոտ, Շիրակի մարզի բնակիչ, 62-ամյա Մարատ Հակոբյանի վարած DAF մակնիշի բեռնատարի առանց կցորդիչի բեռնատար հատվածը կոշտ քարշակման ժամանակ մոտ 200 մետր գլորվել է ձորը, տեղեկացնում է shamshyan.com–ը: Ըստ նախնական տեղեկությունների, բարեբախտաբար, տուժածներ չկան: Փաստի առթիվ նյութեր են նախապատրաստվում: Կայքի տեղեկություններով՝ DAF-ը КамАЗ բեռնատար մակնիշի ավտոմեքենայի վարորդ, Սյունիքի մարզի բնակիչ, 29-ամյա Սուրեն Մակարյանը քարշակով տեղափոխելիս է եղել, երբ ոլորանապտույտ հատվածում քարշակը կոտրվել է, ինչից հետո DAF-ը գլորվելով՝ հայտնվել է ձորում: DAF-ի վարորդը եղել է КамАЗ ի վարորդի հետ:

Պատերազմի 14-րդ օրը ինտենսիվ ռազմական գործողությունների մասին տեղեկություններ չկան, թեև Կիևում պայթյունների ձայներ են լսվել, ռուսական կողմն էլ հայտնել է, որ կեսօրին Լուգանսկում են պայթյուններ եղել: Ռուսաստանի արտգործնախարարության տեղեկություններով՝ ուկրաինացիները քաղաքացիական օբյեկտները՝ բնակելի տները մարտական հենակետեր են դարձնում: Սա, ըստ պաշտոնական Մոսկվայի, նորից է հաստատում, որ ռուսական զինուժը չի հարվածում Ուկրաինայի խաղաղ բնակավայրերին: