Լրահոս

Հունիսի 29-ը անհայտ կորած ազատամարտիկների հիշատակի օրն է: Գերիների, պատանդների և անհայտ կորածների հարցերով զբաղվող հանձնաժողովի նախագահ, Արցախի հանրապետության ՆԳ նախարար Կարեն Սարգսյանի նախագահությամբ «Անհայտ կորած ազատամարտիկների հարազատների միություն»-ում տեղի է ունեցել հանձնաժողովի հերթական նիստը: ԱՀ ՆԳՆ արտակարգ իրավիճակների պետական ծառայությունից հայտնում են, որ քննարկվել են 2022 թ. առաջին կիսամյակում կատարված աշխատանքները և հստակեցվել են աշխատանքային հետագա ծրագրերը: Նիստի ընթացքում արձանագրվել է, որ Արցախի Հանրապետության իշխանությունները մշտապես համագործակցելով Հայաստանի Հանրապետության գերատեսչությունների հետ, օգտագործելով բոլոր լծակները՝ մարդասիրական կառույցների և մարդու իրավունքների եվրոպական դատարանի խողովակներով մշտապես ակտիվ ու նախաձեռնող է անհայտ կորածների ճակատագրերի բացահայտման հարցերով: 2020 թվականի նոյեմբերի 13-ից մինչև 2022 թվականի առաջին կիսամյակը, որոնողական աշխատանքների արդյունքում ի հայտ է բերվել 1711 աճյուն և մասունքներ: Մինչ օրս անհետ կորած են համարվում 53 հոգի, 33-ը՝ զինծառայող, 20-ը՝ քաղաքացիական: Կարեն Սարգսյանը նշել է, որ այս պահին ռուսական և ադրբեջանական կողմերի հետ բանակցություններ են տարվում զոհված զինծառայողների աճյունների ու մասունքների որոնողական աշխատանքները վերսկսելու նպատակով:

Ըստ ոստիկանության օպերատիվ հաղորդագրությունների ամփոփագրերի՝ հունիսի 28-ից 29-ը Հայաստանի Հանրապետության ոստիկանության ստորաբաժանումները բացահայտել են հանցագործության 57 դեպք, որից 2-ը՝ նախկինում կատարված։ Մասնավորապես՝ անձնական ունեցվածքի գողության՝ 15, մարմնական վնասվածք պատճառելու և թմրամիջոցի հայտնաբերման՝ 7-ական, խարդախության, ընտանեկան բռնության, շրջանառությունն արգելված թմրամիջոցներ, հոգեմետ (հոգեներգործուն), խիստ ներգործող կամ թունավոր նյութեր պարունակող բույսեր ցանելու կամ աճեցնելու ու ծեծի՝ 3-ական, զենք-զինամթերքի առգրավման և ծանր վիրավորանքի՝ 2-ական, անձի առևանգման, յուրացնելու կամ վատնելու, գույքը դիտավորությամբ ոչնչացնելու, խուլիգանության, իշխանության ներկայացուցչի նկատմամբ բռնության, գույքն անզգուշությամբ ոչնչացնելու կամ վնասելու, դատական ակտը դիտավորությամբ չկատարելու, սպանության սպառնալիքի ու աշխատանքի պաշտպանության կանոնները խախտելու՝ 1-ական դեպք։ Հայտնաբերվել է 4 հետախուզվող։ Կամավոր ներկայացել է 2 հետախուզվող։ Գրանցվել է զենք-զինամթերքի կամավոր հանձնման 2 դեպք։ Նախկինում կատարված հանցագործություններից բացահայտվել է անձնական ունեցվածքի գողության 2 դեպք։ Անցած 1 օրվա ընթացքում հանրապետությունում արձանագրվել է ճանապարհատրանսպորտային 9 պատահար. 13 մարդ ստացել է տարբեր աստիճանի մարմնական վնասվածքներ:

ՀՀ գլխավոր դատախազությունը պետական շահերի պաշտպանության գործառույթի շրջանակում շարունակում է ուսումնասիրությունները նաև պետության ոչ գույքային շահերի պաշտպանության ուղղությամբ: Այդ շրջանակում ՀՀ գլխավոր դատախազությունում ուսումնասիրվել է նաև ՀՀ տարածքում մթնոլորտային օդի որակի և օդն աղտոտող նյութերի սահմանային թույլատրելի կոնցենտրացիաների պահպանության ոլորտում սահմանված պահանջների պահպանման վիճակը: Այդ նպատակով անհրաժեշտ տվյալներ և փաստաթղթեր են ստացվել «Հիդրոօդերևութաբանության և մոնիթորինգի կենտրոն» ՊՈԱԿ-ից, ՀՀ բնապահպանության և ընդերքի տեսչական մարմնից: Ուսումնասիրությունը փաստել է, որ Երևան քաղաքում և հանրապետության մի շարք խոշոր քաղաքներում՝ Գյումրիում, Վանաձորում, Ալավերդիում, Հրազդանում և Արարատում, արձանագրվել են օդն աղտոտող նյութերի սահմանային թույլատրելի կոնցենտրացիաներից կամ խտություններից գերազանցումների բազմաթիվ դեպքեր: Մասնավորապես՝ Երևան քաղաքում վերջին 5 տարիների ընթացքում դիտվել է փոշու և ազոտի երկօքսիդի աճման տենդենց: Մայրաքաղաքի մթնոլորտային օդում աղտոտիչների՝ փոշու միջին տարեկան կոնցենտրացիաների (մգ/մ3) փոփոխությունները 2016-2021թթ. կազմել են՝ 0,0953-ից մինչև 0,1720, իսկ ազոտի երկօքսիդինը 0,0165-ից մինչև 0,0284: 2021թ. իրականացված դիտարկումների 29%-ում դիտվել են փոշու, 13%-ում ծծմբի երկօքսիդի, 0,4%-ում ազոտի երկօքսիդի, 1%-ում գետամերձ օզոնի համապատասխան սահմանային թույլատրելի կոնցենտրացիաներից գերազանցումներ: Որոշ շեղումներով գրեթե նույն պատկերն է նաև Գյումրի, Վանաձոր, Ալավերդի, Հրազդան, Արարատ քաղաքներում: Աղտոտվածությունը պայմանավորված է արդյունաբերական գործընթացներով, տրանսպորտային միջոցների շահագործմամբ, շինարարական, գյուղատնտեսական որոշ գործոններով, կանաչապատ տարածքների պակասով: Ուսումնասիրությամբ պարզվել է, որ մթնոլորտային օդի պահպանության բնագավառում իրականացված ստուգումների արդյունքներով 2019-2021թթ. ընթացքում իրավաբանական և ֆիզիկական անձանց նկատմամբ Երևան քաղաքում հարուցվել է թվով 79, Շիրակի մարզում՝ 30, Լոռու մարզում՝ 8, Կոտայքի մարզում՝ 15, Արարատի մարզում՝ 14 վարչական վարույթ: Այս տվյալները վկայում են, որ չնայած ձեռնարկված միջոցառումներին, օդի աղտոտվածության վիճակը շարունակում է բարձր մնալ: Հաշվի առնելով հարցի կարևորությունը և դրա անմիջական ազդեցությունը բնակչության առողջության վրա՝ Գլխավոր դատախազությունից հաղորդում է ներկայացվել ՀՀ բնապահպանության և ընդերքի տեսչական մարմին: Առաջարկվել է, որպես լիազոր պետական մարմին, հնարավոր սեղմ ժամկետում քննարկել վերահսկողական և այլ գործառույթներն ավելի հաճախակի իրականացնելու հարցը՝ կիրառելով պատասխանատվության միջոցներ: Խոսքը, մասնավորապես, կարող է վերաբերել անշարժ և շարժական աղբյուրներից մթնոլորտային օդն աղտոտող նյութերի սահմանային թույլատրելի արտանետումների նորմատիվների խստիվ պահպանման, արտանետումների մաքրման և հսկողության սարքավորումների շահագործման, բնակավայրերում արտադրական, կենցաղային թափոնների և մթնոլորտը փոշիով, վնասակար գազերով ու գարշահոտ նյութերով աղտոտելու աղբյուր հանդիսացող թափոնների պահեստավորման կամ դրանց այրման պահանջների պահպանման, կառուցվող, վերակառուցվող ու քանդվող օբյեկտների շինարարության ընթացքում փոշու արտանետումների համար սահմանված նորմատիվների պահպանման նկատմամբ վերահսկողության ուժեղացմանը:

Կրեմլը հեգնանքով է արձագանքել Մեծ Բրիտանիայի վարչապետ Բորիս Ջոնսոնի այն հայտարարությանը, թե ՌԴ նախագահ Վլադիմիր Պուտինը պատերազմ չէր սկսի Ուկրաինայում, եթե կին լիներ։  ՌԻԱ «Նովոստի»-ի հարցին՝ թե ինչպես է Կրեմլը գնահատում Ջոնսոնի խոսքերը, ՌԴ նախագահի մամուլի քարտուղար Դմիտրի Պեսկովը պատասխանել է՝ ծերուկ Ֆրոյդն կենդանության օրոք կերազեր հետազոտությունների նման օբյեկտի մասին։

News.am-ը գրում է․ Հանձնաժողովի նախագահի պաշտոնից ինձ հեռացնելով՝ իշխանությունը չի կարող կասեցնել իրենց դեմ ուղղված իմ պայքարը: Այս մասին NEWS.am-ի հետ զրույցում ասաց «Հայաստան» խմբակցության պատգամավոր, տնտեսական հարցերի մշտական հանձնաժողովի նախագահ Վահե Հակոբյանը՝ մեկնաբանելով իրեն պաշտոնազրկելու՝ իշխող խմբակցության սկսած գործընթացը: «Սա դեռ միայն «Քաղաքացիական պայմանագիր» խմբակցության որոշումն է, երբ այն պաշտոնական դառնա, ես հայտարարություն կանեմ: Ամեն դեպքում ՔՊ-ի որոշումն ինձ համար առ ոչինչ է, որովհետեւ ՔՊ-ն եւ իր ղեկավարն ինձ համար առ ոչինչ են: Սա կոնկրետ իմ անձի դեմ արված որոշում է, որովհետեւ ես միշտ կոպիտ եմ արտահայտվել այս իշխանության հասցեին ու Նիկոլի կոկորդին մնացած ոսկոր եմ: Իրենք մտածում են, թե այս քայլով ինձ կդնեն անելանելի վիճակում, կտխրեցնեն, բայց չարաչար սխալվում են: Այդ պաշտոնն իմ երազանքը չէր: Հանձնաժողովի նախագահի պաշտոնը զբաղեցնեմ, թե՝ ոչ, մանդատ ունենամ, թե՝ ոչ, ես պայքարելու եմ Նիկոլի եւ նիկոլիզմի դեմ»,- նշեց Վահե Հակոբյանը: Վահե Հակոբյանի խոսքով՝ եթե իր պաշտոնազրկումը տեղի ունենա, իշխող խմբակցություն չի անտեսի Դոնթի բանաձեւ: «Բաբկեն Թունյանը, որպես նախագահի տեղեկալ, կվարի նիստերը, իրենք էլ նախագահի պաշտոնում որեւէ մեկին չեն ընտրի: Իրենք անում են շատ ավելի վատ բաներ, ինչի մեջ մեղադրում էին նախկիններին: Դաշտում ցանկանում են մնալ միայն իրենք, բարի երթ եմ մաղթում»,- հավելեց Հակոբյանը: Հիշեցնենք, որ նախօրեին՝ հունիսի 28-ին, իշխող խմբակցություն «Քաղաքացիական պայմանագիրը» որոշում է կայացրել Ազգային ժողովի փոխխոսնակ Իշխան Սաղաթելյանին եւ Տնտեսական հարցերի մշտական հանձնաժողովի նախագահ Վահե Հակոբյանին պաշտոնազրկելու գործընթաց սկսել:

Հուլիսի 1-ին ժամը 19։30 Ֆրանսիայի հրապարակում տեղի կունենա «Դիմադրության» շարժման համաժողովրդական հանրահավաքը։ «Դավաճանների այս իշխանությունը շարունակում է երկիրը թշնամուն հանձնելու քաղաքականությունը։ Մենք պետք է դիմադրենք թշնամու և Նիկոլի օրակարգին՝ հեռացնելով չարիքի այս իշխանությանը։ Դրա համար մեզ պետք է համառություն, միասնություն և աննահանջ պայքար։Սա է մեր ժողովրդի գլխավոր խնդիրը, որը միասին լուծելու ենք»։

Իրանն ու ԱՄՆ-ն, ամենայն հավանականության, պատրաստ են անուղղակի բանակցություններ սկսել Կատարում, որոնց նպատակն է փրկել համաշխարհային տերությունների հետ Թեհրանի կնքած միջուկային համաձայնագիրը, հայտնում է Al Arabiya-ն: Պետական Tehran Times-ը տեղադրել է հյուրանոցի նախասրահում Իրանի միջուկային ծրագրի գլխավոր բանակցող Ալի Բաղերի Կանիի լուսանկարը Կատարում Իրանի դեսպան Համիդրեզա Դեհղանիի հետ: Թերթը նշում է, որ Բաղերի Կանին բանակցությունների վերսկսման նպատակով է գտնվում Կատարի մայրաքաղաք Դոհայում։ Բանակցություններից առաջ Կատար է ժամանել նաև Իրանի հարցով ԱՄՆ հատուկ ներկայացուցիչ Ռոբ Մալլին: Դոհայում ԱՄՆ դեսպանատունը հայտնել է, որ Մալլին հանդիպել է Կատարի արտաքին գործերի նախարար Մուհամեդ բեն Աբդուլրահման Ալ Թանիի հետ՝ քննարկելու «Իրանի հետ խնդիրները լուծելուն ուղղված համատեղ դիվանագիտական ջանքերը», սակայն հրաժարվել է այլ մանրամասներ ներկայացնել իր այցի մասին: Չնայած բանակցություններ անցկացնելու պատրաստակամությանը՝ Իրանի միջուկային ծառայության ղեկավարը հաստատել է, որ Թեհրանը սկսել է առաջավոր ցենտրիֆուգների նոր կասկադ տեղադրել իր ստորգետնյա Ֆորդո օբյեկտում: Ատոմային էներգիայի միջազգային գործակալությունն ավելի վաղ հայտնել էր, որ Իրանը ծրագրում է հարստացնել ուրանը 166 առաջավոր IR-6 ցենտրիֆուգներից բաղկացած նոր շղթայի միջոցով:

Լարսում նորից արտակարգ իրավիճակ է: Ըստ վրացական աղբյուրների՝ կրկին վարարել է Թերեք գետը, հեղեղել Վրաստանը Ռուսաստանին կապող ճանապարհի մի հատվածը: Երկուշաբթի գիշերը Վրաստանի կողմից վերաբացված ճանապարհը երեկ նորից փակվել է՝ առատ տեղումների պատճառով: Այդ հատվածով կարող են երթևեկել միայն թեթև մարդատար մեքենաները:

Չորս ամիս է, ինչ սկսել ենք «Հայկական օրակարգ» նախագիծը։ Քննարկվել են ներքին և արտաքին բազմաթիվ խնդիրներ։ Դրել ենք սկզբունքներ. չենք խուսափում որևէ բարդ հարցից, հարգում ենք միմյանց տեսակետները, չենք վիրավորում և չենք փառաբանում որևէ մեկին։ Քննարկում ենք հարցեր ու փորձում ձևակերպել լուծումներ։ Չորս ամիսների ընթացքում ունեցել ենք 40-ից ավել մասնակիցներ, որոնց անվանական ցանկը կուզեինք ներկայացնել. Էլինար Վարդանյան, Արթուր Վանեցյան, Արմեն Գևորգյան, , Վահե Հովհաննիսյան, Սաթիկ Սեյրանյան, Դավիթ Հարությունյան, Արամ Վարդևանյան, Կարեն Վրթանեսյան, Արտակ Զաքարյան, Բագրատ Եսայան, Աննա Գրիգորյան, Թևան Պողոսյան, Հրանտ Մելիք-Շահնազարյան, Տիգրան Աբրահամյան, Ռուբեն Մելքոնյան, Արման Աբովյան, Ռուբեն Կարապետյան, Հրաչ Ռոստոմյան, Արթուր Խաչիկյան, Կարեն Ճշմարիտյան, Միքայել Մելքումյան, Թադևոս Ավետիսյան, Հարություն Մնացականյան, Ավետիք Չալաբյան, Արգիշտի Կիվիրյան, Ստեփան Դանիելյան, Ավետիք Իշխանյան, Ռոբերտ Հայրապետյան, Շաքե Իսայան, Գառնիկ Գևորգյան, Կարեն Քոչարյան, Ռուբեն Մելիքյան, Գոհար Մելոյան, Ռոբերտ Հայրապետյան, Ալեքսանդր Կոչուբաև, Վահագն Մելիքյան, Վլադիմիր Մարտիրոսյան, Գագիկ Մինասյան, Իվետա Տոնոյան, Սպարտակ Սեյրանյան։ Ո՞վ է ասում, որ մենք չունենք ռեսուրս՝ մեր երկիրը վերականգնելու, չունենք ռեսուրս՝ արժանապատվություն վերականգնելու, հարևանների հետ բանակցելու, լուրջ-ժամանակակից պետություն կառուցելու։ Սա ընդամենը չորս ամսվա մեր հյուրերի ցանկն է։ Առնվազն 2-3 նմանատիպ անվանացանկ ուղղակի չենք հասցրել հրավիրել, և նրանք մեր հյուրը կլինեն առաջիկայում։ Այսինքն՝ ունենալ 150-200 հոգանոց հրապարակային գործիչների, մասնագետների, փորձ ու գիտելիք ունեցողների՝ բավականին տպավորիչ ցանկ ու ասել, թե «գործողներին ումո՞վ փոխենք», առնվազն ծիծաղելի է։ Ի դեպ՝ գործողների մեջ էլ կան ճիշտ պայմաններում լավ աշխատանքի ունակ մարդիկ։ Խնդիրը ճիշտ պայմաններ ստեղծելն է։ Մենք պետք է դադարենք լիդերներ հորինել կամ լիդերների սպասել։ Ռեսուրս չե՞ն ամեն քննարկումից հետո մեզ գրող, զանգող, առաջարկներ ու առարկություններ ունեցող մտահոգ քաղաքացիները, թե՞ ռեսուրս չեն փայլուն երիտասարդները, ովքեր երկու ամիս է՝ պայքարի մեջ են, իսկ ոմանք՝ արդեն բանտերում։ Ռեսուրս չե՞ն բազմաթիվ հոգևոր հայրերը, ովքեր ամեն օր, ամենադժվար պահերին մնում են մարդու կողքին՝ իրենց խորհրդով, օգնությամբ, հորդորով, նվիրումով։ Եթե մենք սպասում ենք, որ լուսնից կիջնեն ինչ-որ նոր հայեր, ովքեր ուշքի կբերեն մեր պետությունը, չարաչար սխալվում ենք. չեն գալու, չեն փրկելու։ Մենք մարդկային լուրջ ռեսուրս ունենք՝ առաջ գնալու, անցյալը վերաիմաստավորելու, անցյալի սխալներն առանց բարդույթների նշելու, այս մղձավանջից դուրս գալու ու հետպատերազմյան վերելք ունենալու համար։

ZDF-ին տված հարցազրույցում Մեծ Բրիտանիայի վարչապետ Բորիս Ջոնսոնը հայտարարել է՝ եթե Ռուսաստանը կին նախագահ ունենար, նա պատերազմ չէր սկսի Ուկրաինայում: «Եթե Պուտինը կին լիներ, ես պարզապես չեմ կարծում, որ նա նման պատերազմ սկսեր։ Կարծում եմ ՝ կռիվը «թունավոր առնականության» արդյունք է»,- ասել է Ջոնսոնը և կոչ արել, որ ավելի շատ կանայք զբաղեցնեն ղեկավար պաշտոններ:

ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում ավարտվել է 2022թ. մայիսի 17-ին Կիևյան փողոցում քաղաքական ընդդիմության նախաձեռնած անհնազանդության ակցիայի մասնակիցների կողմից ՀՀ ոստիկանության աշխատակցի նկատմամբ բռնություն գործադրելու դեպքի առթիվ հարուցված քրեական գործով մեկ մեղադրյալի մասով նախաքննությունը: Այս մասին հայտնում են Քննչական կոմիտեից։ Մինչդատական վարույթում ձեռնարկված քննչական և դատավարական անհրաժեշտ գործողությունների, ինչպես նաև ՀՀ ոստիկանության ծառայողների հետ համատեղ իրականացված միջոցառումների արդյունքում պարզվել են քրեական գործով էական նշանակություն ունեցող հանգամանքներ: Այսպես՝ 2022թ. մայիսի 17-ին՝ ժամը 08.30-ի սահմաններում, անհնազանդության ակցիա իրականացնող մի խումբ քաղաքացիներ փակել էին Երևան քաղաքի Կիևյան փողոցի 15 հասցեի դիմացի երթևեկելի հատվածը՝ այդ կերպ խոչընդոտելով այլ քաղաքացիների ազատ տեղաշարժը: Նշված վայրում ծառայություն իրականացնող ՀՀ ոստիկանության աշխատակիցները, իրականացնելով հասարակական կարգի պահպանություն, հորդորել էին ազատել փողոցի բանուկ հատվածը, սակայն անհնազանդության ակցիայի մասնակիցները չէին ենթարկվել ոստիկանության աշխատակիցների՝ փողոցն ազատելու և երթևեկությունը վերականգնելու օրինական պահանջներին, ինչի կապակցությամբ ակցիայի մասնակիցներից մի քանիսը բերման էին ենթարկվել: Այդ ընթացքում Իգոր Յուրիի Խաչատուրովը, ակցիայի մեկ այլ մասնակցի հետ, խոչընդոտել էր փողոցն ազատելու և անձանց բերման ենթարկելու՝ ՀՀ ոստիկանության տեսուչի գործողություններին, նրա նկատմամբ առողջության համար ոչ վտանգավոր բռնություն էր գործադրել՝ բռունցքով մի քանի անգամ հարվածելով նշված աշխատակցի կրծքավանդակի և որովայնի հատվածներին, որպիսի գործողությունները կապված են եղել վերջինիս ծառայողական պարտականությունների կատարման հետ: Ձեռք բերված բավարար ապացույցների համակցությամբ Ի.Խաչատուրովին մեղադրանք է առաջադրվել՝ ՀՀ քրեական օրենսգրքի 316-րդ հոդվածի 1-ին մասով, և որպես խափանման միջոց վերջինիս նկատմամբ կիրառվել է կալանավորումը: Ի.Խաչատուրովի վերաբերյալ մասն առանձնացվել է առանձին վարույթում, հայտարարվել է նախաքննության ավարտի մասին, և քրեական գործը, ՀՀ քրեական դատավարության օրենսգրքի 272-րդ հոդվածով սահմանված կարգով, ուղարկվել է դատավարական հսկողություն իրականացնող դատախազին՝ մեղադրական եզրակացությունը հաստատելու և դատարան ուղարկելու միջնորդությամբ:

ՌԻԱ «Նովոստի»-ի փոխանցմամբ՝ Երգիչ Պիեռ Նարցիսին վերջին հրաժեշտի արարողությունը կրկին հետաձգվել է՝ այս անգամ հունիսի 29-ից հունիսի 30-ը։ Արտիստի նախկին կինը բացատրել է, որ դա տեղի է ունեցել հանգուցյալի մոր և քրոջ նախաձեռնությամբ։ «Նրանց հետ դիվանագիտական զրույցներ ենք ունեցել, ընտանեկան զրույցներ, ամեն ինչ արել ենք բարձր, դեսպանատան մակարդակով։ Վերջնաժամկետը հինգշաբթի է, հինգշաբթի թույլ կտան հրաժեշտ տալ»,- ասել է Նարցիսի նախկին կինը և հավելել, որ հրաժեշտի արարողությունից հետո մարմինն անմիջապես Կամերուն կուղարկվի:

Հռոմում շարունակվում է մինչև 20 տարեկանների ըմբշամարտի Եվրոպայի առաջնությունը։  60 կգ քաշային հունահռոմեական ոճի ըմբիշ Սուրեն Աղաջանյանը իր առաջին երկու գոտեմարտերում բացահայտ առավելությամբ հաղթել էր լատվիացի և շվեդ ըմբիշներին և դուրս եկել կիսաեզրափակիչ, որտեղ հանդիպել է ադրբեջանցի Նիհաթ Մամադլիի հետ: Ադրբեջանցու հետ Սուրենը ևս փայլուն է գոտեմարտել ու դարձյալ առավելության է հասել ժամանակից շուտ 9-1 հաշվով:

Հռոմում շարունակվում է մինչև 20 տարեկանների ըմբշամարտի Եվրոպայի առաջնությունը։  130 կգ քաշային Ալբերտ Վարդանյանը տուշե հնարքով հաղթել է թուրք մարզիկ Թալիփ Չիֆթչիին և դարձել է բրոնզե մեդալակիր: 87 կգ քաշային Վիգեն Նազարյանը ևս նվաճել է բրոնզե մեդալ՝ վճռորոշ գոտեմարտում հաղթելով շվեդ Ալգոտ Կաելմանին:

ՀՀ նախկին գլխավոր դատախազ Աղվան Հովսեփյանի փաստաբանական թիմը հայտարարություն է տարածել, որտեղ, մասնավորապես, նշված է. «Աղվան Հովսեփյանը 30.05.2022թ․ առ այսօր գտնվում է «Միքայելյան վիրաբուժական ինստիտուտ» ՓԲԸ ԼՕՌ կլինիկայում։ Բուժման շրջանում Աղվան Հովսեփյանի մոտ դիտվել է գլյուկոզայի ցուցանիշների բարձրացում, որի կապակցությամբ նշանակվել է էնդոկրինոլոգի կրկնակի խորհրդատվություն։ Ի թիվս այլ հիվանդությունների՝ ախտորոշվել է շաքարային դիաբետ 2-րդ տիպ /ինսուլինակախյալ ֆազալ դեկոմպենսացված վիճակ/, դիաբետիկ միկրո-մակրոանգիոպաթիաներ, դիաբետիկ պոլինեյրոպաթիա։ Հատկանշական է, որ պարոն Հովսեփյանի մոտ առկա հիվանդությունն ընդգրկված է կալանքը եւ պատիժը կրելուն խոչընդոտող ծանր հիվանդությունների ցանկում: Նշվածը հիմք ընդունելով, պաշտպանության կողմը միջնորդություն է ներկայացրել դատարան, որով խնդրել է հրավիրել արտահերթ դատական նիստ և կրկին քննարկել Աղվան Հովսեփյանի խափանման միջոցի փոփոխման հարցը, քանզի ստեղծված իրավիճակի պայմաններում Հովսեփյանի կալանքի տակ գտնվելը ոչ միայն ապօրինի է, այլեւ իր մեջ պարունակում է խոշտանգման տարր»։

Արցախի ազգային անվտանգության ծառայության կողմից պետական դավաճանության 5 նոր դեպք է բացահայտվել:

«Վեոլիա Ջուր» ընկերությունը տեղեկացնում է իր հաճախորդներին և սպառողներին, որ վթարի վերացման աշխատանքներով պայմանավորված, ս.թ. հունիսի 29-ն ժամը 10:00-ից մինչև հունիսի 30-ը ժամը 10:00-ն կդադարեցվի Սյունիքի մարզի Սիսիան քաղաքի և Ույծ գյուղի ջրամատակարարումը: Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:

Յեյլի համալսարանից նոր հետազոտությունը, որն անցկացվել է գերմանացի գիտնականների հետ համատեղ, ցույց է տվել, որ լյարդը կարեւոր դեր է խաղում մկների սննդային վարքագծի կարգավորման գործում: Մի շարք փորձերի միջոցով հետազոտական ​​թիմը հայտնաբերել է այն շղթան, որով ուղեղն ու լյարդը շփվում են միմյանց հետ եւ կառավարում միմյանց։ Այդ զրույցի երկու հիմնական խաղացողներն են բջիջների խումբը, որը հայտնի է որպես ագուտի (AgRP) հետ կապված սպիտակուցի նեյրոններ, որոնք բնակվում են ուղեղի հիպոթալամուսում եւ լյարդի կողմից արտազատվող լիպիդի մի տեսակ, որը կոչվում է լիզոֆոսֆատիդիլխոլին (LPC): AgRP նեյրոնները, որոնք փոխազդում են գլխուղեղի կեղեւի հետ, անհրաժեշտ են սովի առաջացման համար: Բայց նրանք նաեւ փոխազդում են մարմնի այլ մասերի հետ, ինչպիսիք են լյարդը եւ ենթաստամոքսային գեղձը: Այս նեյրոնները կարեւոր դեր են խաղում մարմնի ճարպային պաշարներից լիպիդների ազատման գործում: Հետազոտության ընթացքում գիտնականները նկատել են, որ սովից հետո մկների մոտ ավելացել է LPA-ի մակարդակը: LPA մակարդակի բարձրացումն առաջացրել է ուղեղային կեղեւի նեյրոնների ակտիվության բարձրացում, ինչը սովից հետո առաջացրել է ախորժակի աճ: Եվ այս բոլոր ազդեցությունները կախված էին AgRP նեյրոնների գործառույթից։