Խոպանչիների սիրտը պայթում է. «Էս պետությունը պրծել ա», ՊԵԿ-ում էլ տագնապ է ընկել

Գրեթե 9 ժամ է՝ փակ է Մարտունի-Երևան ավտոճանապարհը: Խոպանչիները բողոքում են կառավարությունից, որ ծանուցագրեր է ուղարկել իրենց հարկային պարտավորությունների մասին: Ըստ պաշտոնական մեկնաբանության՝ դեռ 2020 թվականին ԱՊՀ շրջանակներում Հայաստանը միացել է միջազգային պայմանագրի, որով հարկային մարմինները միմյանց միջև էլեկտրոնային եղանակով փոխանակում են միգրանտներին վճարված եկամուտների մասին տեղեկություն։ Հիմա Հայաստանը ստացել է իր քաղաքացիների ցանկը ու ըստ դրա՝ ծանուցագրեր է ուղարկել: Հարկային օրենսգրքում կատարված փոփոխություններով՝ եթե Հայաստանի քաղաքացի աշխատանքային միգրանտը 183 օրից պակաս է մնում Ռուսաստանում, նա պետք է 30 տոկոս եկամտահարկ վճարի պետությանը: Խոպանչիները պնդում են, որ ռուբլու կուրսն այնքան ցածր է, որ հազիվ են ընտանիքները պահում, եթե հարկվեն, իրենց աշխատելն անիմաստ կլինի: