Քրոնիկ հիվանդություններով տարեցներն ավելի խոցելի են սուր շնչառական վարակների զարգացման առումով. ԱՆ

Քրոնիկ հիվանդություններ ունեցող մեծահասակներն ավելի խոցելի են սուր շնչառական վարակների զարգացման առումով։

Այս մասին հայտնում են ՀՀ առողջապահության նախարարությունից՝ նշելով, թե ովքեր են բարձր ռիսկի խմբում:

«Նրանք են՝

• Սրտի, թոքերի, երիկամների քրոնիկ հիվանդություններ ունեցողները
• Շաքարային դիաբետ ունեցող անձինք
•  Տարեցները և իմունային անբավարարություն ունեցող անձինք:

Գրիպի հիմնական ախտանշաններն են`

• Գլխացավ
• Մկանացավեր
• Ջերմության կտրուկ բարձրացում
• Ցավ կոկորդում, չոր հազ
• Հնարավոր են նաև լուծ և փսխումներ:

Տարեցների և իմունային անբավարարություն ունեցող անձանց մոտ ախտանշանները կարող են լինել ոչ բնորոշ՝ արտահայտվելով գիտակցության խանգարումներով կամ քրոնիկ հիվանդության սրացմամբ՝ առանց ջերմության բարձրացման։

Ինչու՞ պետք է քրոնիկ հիվանդություններ ունեցող մարդիկ պատվաստվեն սեզոնային գրիպի դեմ`

• Նվազեցնում է գրիպով հիվանդանալու հավանականությունը
• Կանխում է քրոնիկ հիվանդության սրացումը
• Նվազեցնում է հոսպիտալացման անհրաժեշտությունը:

Եթե ունեք քրոնիկ հիվանդություն և նկատում եք սուր շնչառական վարակի նշաններ, անհապաղ դիմե՛ք ձեր տեղամասային բժշկին։ Ուշացած կամ ինքնաբուժման հետևանքով բարդացած դեպքերը կարող են ծանր հետևանքներ ունենալ»,- ասված է ԱՆ հաղորդագրության մեջ։