Լրահոս
Իրավական
13:40
27.05.24
115

Ոստիկանները գազ են կիրառել, ծեծել են, հայհոյել. մասշտաբային անհնազանդության ակցիաներ՝ Երևանում

Առավոտից մայրաքաղաքում մասշտաբային անհնազանդության ակցիաներ են եղել: Մեկ տասնյակից ավելի փողոցներ են կաթվածահար արել «Տավուշը հանուն հայրենիքի» շարժմանն աջակցողները: Ակցիայի մասնակիցները ահազանգել են, որ իրավապահները որոշ փողոցներում ինչ-որ գազ են կիրառել, ինչից հետո ցուցարարները սկսել են խեղդվել:

ՀՅԴ Գերագույն մարմնի շենքի մոտ կարմիր բերետավորեները ծեծել են «Հայաստան» խմբակցության պատգամավոր Աշոտ Սիմոնյանին, հայհոյել նրան: Ներքին գործերի նախարարությունը հայտնում է, որ այդ դեպքով ծառայողական քննություն է նշանակվել:

Ժողովրդական երգիչ Արսեն Գրիգորյանի ոտքը վնասել են ոստիկանները, նրան շտապօգնության մեքենայով տեղափոխել են Էրեբունի բժշկական կենտրոն: Բիրտ ուժ կիրառելով ոստիկանները բերման են ենթարկել նաև գեներալ-գնդապետ Յուրի Խաչատուրովի որդուն՝ Իգոր Խաչատուրովին: Կեսօրից մեկ ժամ առաջ լարված է եղել իրավիճակը Սայաթ-Նովա պողոտայում:

Աղբարկղերով, ինքնագլորներով փողոցը փակածներին սև բերետավորներն անհամաչափ ուժ կիրառելով բերման են ենթարկել: Ներքին գործերի նախարարությունը հայտնում է, որ այս պահին 240 ձերբակալված կա: