Ոսկերչական հրաշք, լավ թվերով բրյոշուր կամ ամբողջ ճշմարտությունը Հայաստանի տնտեսության մասին

Ազգային ժողովում կառավարության՝ 2023 թվականի կատարողականը քննարկելիս ընդդիմությունը ազնվություն է պահանջել իշխանությունից՝ բողոքելով, որ իրենց բաժանված բրյոշուրներում տնտեսության իրական վիճակի մասին ամբողջ ճշմարտությունը չէ: Որ տնտեսության աճը նախորդ տարվա համեմատ 8,7 տոկոս է, 40 տոկոսով ավելի շատ տուրիստ է եկել Հայաստան, պարտք-ՀՆԱ ցուցանիշն էլ հաջողվել է վտանգավոր շեմից իջեցնել 48 տոկոսի, լավ է, բայց ինչու՞ կառավարությունը զեկույցում չի նշել, որ տնտեսական աճը դանդաղել է, տրանսֆերտները պակասել են, իսկ ոսկերչական արտադրանքը կասկածելի աճ է գրանցել: