Վրաստանի մենաստաններից մեկում միանձնուհու են բռնաբարել

Վրաստանի Խաշուրիի մունիցիպալիտետի մենաստաններից մեկում միանձնուհու են բռնաբարել: Ըստ առկա տեղեկությունների՝ դեպքը տեղի է ունեցել նոյեմբերի 26-ին, Ցխրամուխիի մենաստանում՝ հարձակման ժամանակ, փոխանցում է Aliq.ge-ը։

Տեղեկությունների համաձայն, գործով ձերբակալել են երկու անձի՝ 27 և 39-ամյա տղամարդու։ Նրանք նախկինում դատապարտված են եղել. մեղադրվում են 1952 թվականին ծնված միանձնուհու նկատմամբ խմբակային կողոպուտի և բռնաբարության մեջ։ Հանցագործությունը պատժվում է մինչև 13 տարի ազատազրկմամբ։

Հարկ է նշել, որ դեպքից տուժած 70-ամյա միանձնուհին Խաշուրիից տեղափոխվել է Թբիլիսի՝ բուժման նպատակով։

Վրաստանի պատրիարքարանի հասարակայնության հետ կապերի ծառայության ղեկավար Անդրիա սարկավագ Ջաղմաիձեի մեկնաբանությունը Ցխրամուխիի մենաստանում տեղի ունեցածի վերաբերյալ հետևյալն է.

«Այն, ինչ այսօր տեղի ունեցավ Ցխրամուխիի մենաստանում, կյանքի է կոչում եկեղեցու պատմության ամենադժվար հիշողությունները։

Բացի ազգային ողբերգությունից դժվար է որևէ անուն ընտրել այս չլսված փաստի համար, որի նմանը եղել է միայն երկիրը հիմնովին ավերել ցանկացող թշնամու արշավանքների ժամանակ, և ոչ միշտ…

Յուրաքանչյուր գործողություն անպայման դրդված է շարժառիթով, իսկ սրբությունը վիրավորելը աղավաղված գաղափարախոսություն է, որը սրբապղծման միջոցով վերացնում է բոլոր արգելքները և պղծում այն, ինչը պետք է սնուցի մարդկանց հոգևոր կյանքը»,- նշել է Ջաղմաիձեն:

Պատրիարքարանի հայտարարության մեջ գերակշռում են մեդիայի հանդեպ մեղադրանքները:

Վրաստանի հանրային պաշտպան Նինո Լոմջարիայի կարծիքով, չափազանց վտանգավոր է Ցխրամուխիի մենաստանում տեղի ունեցած հանցագործության պատճառները բարդել կոնկրետ լրատվամիջոցների վրա։

«Ցխրամուխիի մենաստանում տեղի է ունեցել սարսափելի, դաժան հանցագործություն, ողջ երկիրը ցնցված է, բայց այս հանցագործության պատճառների համար կոնկրետ լրատվամիջոցների ներկայացուցիչներին մեղադրելը չափազանց վտանգավոր է և սխալ»,- նշել է Լոմջարիան։

Օմբուդսմենի խոսքով, վաղը այս հայտարարությամբ հրահրված քաղաքացին կարող է ֆիզիկական հարձակում գործել լրագրողի վրա, բռնաբարել, ինչն արդեն բազմիցս եղել է.

«Վտանգավոր է նման թեմաները շահարկելն ու անմեղ մարդկանցից թշնամու կերպար ստեղծելը։

Բռնության զոհին շուտափույթ ապաքինում եմ մաղթում։ Հուսով եմ, որ այս դժվարին պահին նա պատշաճ զգացմունքային աջակցություն կստանա իր շրջապատից»:

Վրացի վերլուծաբան Զաալ Անջափարիձեն դեպքն անվանել է «ամբողջովին նողկալի փաստ»:

«Ցխրամուխիի մենաստանում տեղի ունեցածը պահանջում է մանրակրկիտ հետաքննություն՝ պարզելու, թե կոնկրետ ինչն է դրդել այս սարսափելի հանցագործությանը: Դրանից հետո մենք կարող ենք մի քանի հեռուն գնացող եզրակացություններ անել»,- նշել է վերլուծաբանը: