Թզի օգտակար հատկությունները, հակացուցումները

«Aysor.am»-ը գրում է.

«Թուզը հարուստ է վիտամիններով, միներալներով, այն կալիումի, կալցիումի, ֆոսֆորի, մագնեզիումի, երկաթի, պղնձի, B1, B3, PP, C վիտամինների աղբյուր է։ Կալիումի պարունակությամբ թուզը զիջում է միայն ընկույզին, ավելի շատ երկաթ է պարունակում, քան խնձորը, ուստի թուզը հատկապես օգտակար է անեմիայի դեպքում։

Թուզը հայտնի է նաև ջերմիջեցնող, հակաբորբոքային հատկությամբ, օգտակար է մրսածության, շնչառական հիվանդությունների դեպքում։ Թուզը հարուստ է նաև թաղանթանյութով, հագեցնում է, կանխում սովի զգացումը։

Ընդունված է համարել, որ թուզն օգտակար է նաև թրոմբների դեմ պայքարում, նպաստում է նաև սրտի ռիթմի կարգավորմանը, բարելավում է մարսողությունը, օգտակար է փորկապության դեմ պայքարում, նպաստում է օրգանիզմում ճարպի մակարդակի կարգավորմանը։

Կալիումի և կալզիումի պարունակության շնորհիվ միրգն օգտակար է սիրտանոթային համակարգի համար, օգնում է արագ վերականգնվել ֆիզիկական ծանրաբեռնվածությունից հետո, նաև օգտակար է վարիկոզ հիվանդության դեպքում, ինչպես նաև նպաստում է իմունային համակարգի ամրացմանը։

Քանի որ թուզը պարունակում է մեծ քանակությամբ շաքար, միրգը ցուցված չէ շաքարային դիաբետ ունեցողներին։ Թզից պետք է հրաժարվեն նաև ստամոքսաաղիքային համակարգի սուր խնդիրներ, քարերի առաջացման հակվածություն ունեցողները։ Թզի չարաշահումը կարող է հանգեցնել ստամոքսի խանգարման կամ դիարեայի»։