Լրահոս
Իրավական
23:10
23.11.22
119

Ինչու՞ է «Թուֆենկյան թրանս կավկազուս»-ը դատի տվել ՀՀ կառավարությանը

Img default alt hy

«Հրապարակ» թերթը գրում է․

««Թուֆենկյան թրանս կավկազուս» ընկերությունը վարչական հայց է ներկայացրել ընդդեմ ՀՀ կառավարության և դատարանից պահանջում է, որ վերջինս Բուզանդի փողոցի թիվ 32 հասցեի անշարժ գույքի նկատմամբ հանրության գերակա շահ ճանաչելու փաստը չեղարկի` իրավահարաբերության բացակայությունը ճանաչի։

Ընկերության ներկայացուցիչ, փաստաբան Միքայել Դանիելյանը «Հրապարակի» հետ զրույցում ասաց, որ խոսքը 2002 թվականին հանրային գերակա շահ ճանաչված տարածքի և դրա վրա գտնվող շինության մասին է: Այն հանրային գերակա շահ է ճանաչվել «Հին Երևան» նախագծի շրջանակներում, սակայն 20 տարի ոչինչ չի իրականացվել․ «Կառավարությունը հանրային գերակա շահ է ճանաչել Բուզանդի 32 հասցեում գտնվող շինությունը։

«Թուֆենկյան թրանս կավկազուս» ընկերությունը դեռ 2002-ից սեփականություն ունի՝ հող և վրան շինություն, «Հին Երևանի» շինարարությունը, որ հիմա իրականացվում է, այդ գույքի նկատմամբ 2002 թ. գերակա հանրային շահ է ճանաչված, և մինչ օրս մոտ 7-8 անգամ հանրային գերակա շահ են ճանաչել, ժամկետը լրացել է` ո՛չ իրացրել են, ո՛չ փոխհատուցում են տրամադրել: Դատական վեճը վերաբերում է այդ հարցին»։ Փաստաբանի խոսքով՝ ընկերությունը 2 հայց է ներկայացրել՝ վարչական և քաղաքացիական։

«Քաղաքացիական հայցով ընկերությունը դատարանին խնդրել է հաստատել, որ այս 20 տարիների ընթացքում ընկերության սեփականության իրավունքը միշտ սահմանափակված է եղել, բայց փոխհատուցում չի ստացել, և դատարանից խնդրել ենք, որ ճանաչի ընկերության սեփականության իրավունքի խախտման փաստը։

Դրանից բացի, նաև ոչ նյութական վնասի, այսպես ասած` բարոյական վնասի փոխհատուցում ենք պահանջել՝ 2 մլն դրամի չափով։ Երկրորդ հայցով, որով դիմել ենք վարչական դատարան, խնդրել ենք, որ մեր գույքի նկատմամբ հանրության գերակա շահի առկայությունը հերքող դատական ակտ կայացնի։ Քանի որ ժամկետը 2022 թվականի դեկտեմբերի 27-ին լրանում է, դիմել ենք դատարան, որպեսզի նորից չճանաչեն հանրային գերակա շահ, այլ այսքանով ավարտվի»։

Այսինքն, պարզ ասած` պետությունը սեփականատիրոջից գույքը վերցրել է, տարածքը ճանաչել է հանրային գերակա շահ, սակայն 20 տարի ոչինչ չի արվել, և սեփականատերն այն խնդրում է հետ վերադարձնել իրեն: Փաստաբանն ասում է, որ, ըստ օրենքի, եթե ոչ մի բան չի արվել 20 տարվա ընթացքում, նշանակում է, որ չկա հանրության գերակա շահ, որը պետք է սպասարկվեր․ «Հանրության շահը չի կարող 20 տարի սպասել»։

Խնդրո առարկան մի կիսախարխուլ շինություն է։ «Այդ տարածքում «Հին Երևանը» պիտի կառուցվեր, պաշտոնապես կոչվում է Գլխավոր պողոտա։ Շինությունն առանձնապես աչքի ընկնող շինություն չէ, այս պահին այնտեղ ոչինչ չի գործում, կարող եմ ասել՝ կիսախարխուլ շինություն է, բայց պատմամշակութային շենքի կարգավիճակ ունի, այդ պատճառով մենք չենք կարող վերակառուցել։ Մեզնից վերցրել են, փաստացի չեն թողնում, որ մենք վերակառուցենք, բայց նաև չեն փոխհատուցում»,- ասաց Դանիելյանը՝ նշելով, որ եթե գույքը հետ ստանան, գուցե այնտեղ ներդրումային ծրագրեր իրականացնեն։

Նշենք, որ Թուֆենկյան ընկերության սեփականատերն է ամերիկահայ գործարար Ջեյմս Թուֆենկյանը, նրան են պատկանում Թուֆենկյան հյուրանոցը, «Թուֆենկյան գորգեր» ձեռագործ գորգերի արտադրությունը և այլն»։