Բնական միջոցներ՝ պեպենները թաքցնելու և մաշկը գունաբացելու համար

Aysor.am-ի փոխանցմամբ՝ պպենները բավական տարածված են՝ հատկապես առավել սպիտակ մաշկ ունեցողների շրջանում, սակայն դրանց նկատմամբ մարդկանց վերաբերմունքը ևս տարբեր է։ Շատերը պեպենները համարում են գրավիչ, մինչդեռ ոմանք էլ  ջանքեր չեն խնայում դրանք ավելի քիչ նկատելի դարձնելու համար։

Մելանին գունանյութի կուտակման հետևանքով առաջացող այս մանր մուգ բծերից ազատվելու համար մարդիկ բավականին մեծ գումարներ են վատնում տարատեսակ կոսմետիկ միջոցների վրա, սակայն գոյություն ունեն ոչ պակաս արդյունավետ բնական միջոցներ, որոնք ավելի հասանելի են ու անվտանգ։

Կան մի շարք բնական միջոցներ, որոնք կօգնեն գունաբացել պեպեններն ու դարձնել դրանք քիչ նկատելի.

Կիտրոնի հյութ

Կիտրոնն արդյունավետ բնական միջոց է պեպեններից և մաշկի այլ պիգմենտային հետքերից ազատվելու համար՝ իր բնական գունաբացող ազդեցության շնորհիվ։ Մաշկը գունաբացելու համար պարզապես հարկավոր է 2-3 թեյի գդալ կիտրոնի հյութը քսել մաշկին, թողնել 10 րոպե, այնուհետև լվացվել։ Այս պրոցեդուրան հարկավոր է կրկնել օրական երկու անգամ։

Հալվե վերա

Այս դեղաբույսը նույնպես օգնում է նվազեցնել մաշկի պիգմենտացիայի մակարդակը, ուստի կարող է կիրառվել նաև պեպենների դեմ պայքարի համար։ Պարզապես հարկավոր է հալվե վերայի թարմ գելը քսել մաշկին, թողնել 15 րոպե, այնուհետև լվացվել սառը ջրով։ Այս պրոցեդուրան հարկավոր է կրկնել օրական մեկ անգամ։

Կեֆիր ու վարսակ

Կեֆիրի բաղադրիչները խոնավացնում են մաշկը, մինչդեռ վարսակը հիանալի բնական միջոց է մաշկի խնամքի համար։ Այս բաղադրիչները հարկավոր է խառնել, պատրաստել թանձր մածուցիկ զանգված, այնուհետև քսել այն դեմքին։ Թողնել դիմակը 15 րոպե, այնուհետև լվացվել գոլ ջրով։ Այս պրոցեդուրան հարկավոր է կրկնել շաբաթական երկու անգամ։

Նշի յուղ

Նուշը հարուստ է А և Е վիտամիններով, որոնք խնամում են մաշկն ու նվազեցնում պիգմենտացիան։ Պեպեններից ազատվելու համար խորհուրդ է տրվում մի քանի կաթիլ նշի յուղը մի փոքր տաքացնել, այնուհետև քսել դեմքին ու մատներով մերսել։ Թողնել մոտ մեկ ժամ, մինչև յուղը հնարավորինս ներծծվի, այնուհետև լվացվել գոլ ջրով։ Այս պրոցեդուրան հարկավոր է կրկնել ամեն օր՝ քնելուց առաջ։

Անանուխ ու բանան

Անանուխը հարուստ է հակաօքսիդանտներով, որոնք օգնում են պեպեններն ավելի քիչ նկատելի դարձնել։ Այս սննդարար նյութերը պարունակվում են նաև բանանի մեջ, որն օգնում է խոնավացնել մաշկը, ուստի անանուխով ու բանանով դիմակը կարող է հիանալի միջոց լինել մաշկը սնուցելու, խոնավացնելու և գունաբացելու համար։ Պարզապես հարկավոր է անանուխն ու բանանը մանրացնել ու խյուս դարձնել, այնուհետև քսել խառնուրդը դեմքին ու թողնել 8-12 րոպե։ Այս պրոցեդուրան հարկավոր է կրկնել շաբաթական երեք անգամ։