Լրահոս

Պետական վերահսկողական ծառայության՝ կասեցված լիազորություններով ղեկավար Դավիթ Սանասարյանը ֆեյսբուքյան իր էջում հայտնել է, որ կարճվել է անչափահասի վրաերթի քրեական գործը, քանի որ փորձագետը հաստատել է իր անմեղությունը: Անչափահաս տուժողի ներկայացուցիչ փաստաբան Տիգրան Աթանեսյանը ըստ էության հերքում է այս տեղեկությունը: Նրա խոսքով Քրեական գործի նյութերով ոչ թե հերքվել, այլ հաստատվել է, որ Սանասարյանն է վրաերթի ենթարկել անչափահասին:

Խորհրդարանում քննարկում են մի նախագիծ, որի ընդունման դեպքում, յուրաքանչյուրս արտերկրում ապրող մեր հարազատներից ու ընկերներից կարող ենք խնդրել ծանրոցով մեզ ուղարկել 3-5 տուփ դեղ: Հիմա նման կարգավորում չկա, ծանրոցով Հայաստան եկող դեղերը ոչնչացնում են:

Երրորդ նախագահ Սերժ Սարգսյանի դեմ բացված դատական գործը մտավ ձգձգումների փուլ: Այսօր առաջին անգամ դատական նիստը հետաձգվեց դահլիճի ծանրաբեռնվածության պատճառով ու հաջորդը կգումարվի միայն մեկ ամսից՝ մարտի 26-ին: Երրորդ նախագահի փաստաբան Ամրամ Մակինյանը այսօր գաղտնիքներ է բացել դիզվառելիքի քրեական գործից, պարզվում է պաշտպանական կողմը ցանկացել է արժեքավոր տվյալներ ավելացնել քննության նյութերին, բայց քննիչը մերժել է դրանք անկարևոր համարելով:

ՀՀ զինված ուժերում կանխարգելիչ միջոցառումները նպատակ ունեն կանխել կորոնավիրուսային հիվանդության ներթափանցումը զորամասեր, հնարավորինս ապահովագրել զինծառայողներին վարակվելուց և անհրաժեշտության դեպքում ճիշտ կազմակերպել հակահամաճարակային գործողությունները:

Հայաստանի նորագույն շրջանի համար այս օրը պատմական է: Նույն օրը երկու նախկին նախագահ դատարանի առաջ էր: Բազմաթիվ փորձագետների ուշադրությունից չի վրիպել նաև փաստը, որ նախագահների դատի օրը համընկել է Խոջալուի իրադարձությունների հետ: Այսօր Սերժ Սարգսյանի և մյուսների գործով առաջին դատական նիստն էր: 3-րդ նախագահը համոզված է, որ իր քրեական գործի բուն նպատակը մարդկանց ուշադրությունը շեղելն է կարևորագույն հարցերից, ներառյալ Ղարաբաղյան խնդրից: Դատարանի դահլիճ մտնելուց առաջ Սերժ Սարգսյանը կրկնել է՝ Արցախը երբեք չի լինելու Ադրբեջանի կազմում:

Կառավարության ամենաթմբկահարված որոշումներից մեկը մինչև 2 տարեկան երեխա ունեցող աշխատող մայրերին դայակի գումարի կեսը տրամադրելու ծրագիրը, պարզվում է շատերի համար միայն թղթի վրա է մնացել: Ծրագրից օգտվել ցանկացող բազմաթիվ մայրիկների զբաղվածության կենտրոնները չեն արձագանքում:

Մեր հարևան Իրանում զոհերի թիվը ամեն օր ավելանում է: Միայն այսօր 3 մարդ է մահացել: Վարակվածների թիվը հասնում է 100-ի: Կորոնավիրուսով վարակվել է նույնիսկ Իրանի առողջապահության փոխնախարարը: Մեր արտաքին քաղաքական գերատեսչության պատասխանատուները հայտնում են, որ Իրանում կորոնավիրուսի տարածման պատճառով Հայաստանի դեսպանություն է դիմել մեր երկրի 65 քաղաքացի: 

91 տարեկանում մահացել է համաշխարհային պատմության ամենահակասական կերպարներից մեկը Եգիպտոսի նախկին նախագահ Հոսնի Մուբարաքը: 3 տասնամյակ երկիրը ղեկավարած Մուբարաքը ցույցերի արդյուքնում 2011-ին հեռացվեց պաշտոնից ու դատապարտվեց ցմահ ազատազրկման: Սակայն, 2017-ին ազատ արձակվեց: Մուբարաքը հաճախ էր կրկնում, որ իրեն դատելու է պատմությունը: Ինքն իրեն ընդամենը հայրենասեր մարդ էր համարում:

Սկանդալ է հասունանում Երևանի թիվ 52 դպրոցում տեղի ունեցած միջադեպի պատճառով: Դպրոցականներից մեկի ծնողը աշակերտների ներկայությամբ ապտակել ու քաշքշել էր ուսուցչին: Ծնողները դիմել են քաղաքապետարան ու նույնիսկ ոստիկանություն՝ հայոց լեզվի ուսուցչուհուն դպրոցից հեռացնելու պահանջով: Դպրոցի անձնակազմը դեպքի վերաբերյալ հայտարարություն է տարածել:Նշելով, որ դիմել են պատկան մարմիններին, բայց անհանգիստ են, թե ով պետք է պաշտպանի անշահախնդիր և նվիրումով աշխատող ուսուցչի շահերը և վերականգնի հեղինակությունը: Հայլուրն այսօր եղել է այդ դպրոցում՝ պարզելու տեղի ունեցածի բոլոր մանրամասները:

Ազնավուրի գրքերն այնքան է սիրել հայ ընթերցողը, որ ՆյուՄեգը որոշել շարունակել դրանք թարգմանելու գործը:

Դատական համակարգը բարեփոխելու իր առաջարկները խորհրդարան բերած Արդարադատության նախարարն այսօր ասել է, թե թարգմանիչն է մեղավոր, որ Սահմանադրական դատարան ուղղագրական, քերականական ու իրավական սխալներով փաստաթուղթ էր գնացել: ՍԴ-ի մերժած նախագիծը հիմա նոր թարգմանչի մոտ են ուղարկել: Ի դեպ, այս մասին հայտնի դարձավ երբ Բարձր դատարանը հարցը քննարկեց լրատվամիջոցների համար բաց նիստում: Այսօր էլ ՍԴ-ն հակասահմանադրական ճանաչեց ոստիկանության ծառայողների իրավունքները սահմանափակող երկու կարգավորում:

Նոր իշխանությունը մեղավոր չէ, որ նախկինում կոռուպցիոն դեպքերն անքան շատ են եղել, որ հիմա դրանց հետքերով գնալիս իրենց մեղադրում են քաղաքական հետապնդումների համար: Արդարադատության երիտասարդ նախարարը կոռուպցիան չի հանդուրժում: Ի դեպ, նա այսօր հաստատել է մամուլի տեղեկությունները, որ 6 ամսում ինքը՝ 16 հազար դոլար պարգևավճար է ստացել: Ընդ որում, սա ավելի քիչ է, քան մյուս նախարարների ստացածը ճշգրտել է նախարարը: Բայց Բադասյանին դուր չեն գալիս մամուլի չար ու նախանձ վերնագրերը այդ պարգևավճարների մասին: Անգամ հեգնել է լրատվամիջոցներին, թե դոլարի փոխարեն չինական յուանով կարող էին հաշվել ավելի ազդեցիկ թիվ գրելու համար: Չինական յուանով, կոլումբիական պեսոյով կամ իրաքյան դինարով, միևնույն է թիվը տպավորիչ է, ցանկացած վերնագրում այն աչք էր ծակելու:

Սահմանադրական կարգի տապալման գործով Քոչարյանի նկատմամբ քրեական հետապնդումը դադարեցնելու և գործը կարճելու միջնորդության վերաբերյալ ամփոփիչ ելույթներն են այսօր հնչել: Դատավոր Աննա Դանիբեկյանը որոշումը կհայտնի մարտի 3-ի: Ինչպես գիտեք երկրորդ նախագահի կալանքը փոխելու համար անձնական երաշխավորություն են ներկայացնելու Հայաստանի նախկին վարչապետեր Վազգեն Մանուկյանը, Խոսրով Հարությունյանը, Կարեն Կարապետյանը և Արցախի նախկին վարչապետ Անուշավան Դանիելյանը: