Լրահոս
Սոցիալական
22:09
02.10.23
4 370

Մանրամասներ` ԼՂ-ից տեղահանված անձանց ՀՀ կառավարության կողմից 100,000 դրամ միանվագ աջակցության տրամադրման վերաբերյալ

Img default alt hy

Լեռնային Ղարաբաղից բռնի տեղահանված չափահաս անձանց 75 տոկոսն ունի քարտեր, որոնք կնույնականացվեն կենտրոնացված տարբերակով: Այս մասին այսօր Կառավարության ասուլիսի ժամանակ ասաց ՀՀ Կենտրոնական բանկի նախագահի տեղակալ Հովհաննես Խաչատրյանը՝ ներկայացնելով Լեռնային Ղարաբաղից բռնի տեղահանված անձանց Կառավարության կողմից 100,000 դրամ միանվագ աջակցության տրամադրման մասին մանրամասները:

Նրա խոսքով՝ աշխատանքը կազմակերպվելու է այնպես, որպեսզի վերջին 15 ամիսների ընթացքում ակտիվ քարտային գործունեություն իրականացրած քարտային հաշիվներին փոխանցվի (անկախ քարտերի ֆիզիկական առկայությանը), որը կլինի տվյալ անձի համար ամենահարմար եղանակը: 

«Եթե պարզվի` քաղաքացու մոտ գործող քարտ կա, սակայն իրականում այն կորսված է, կարող է մոտենալ բանկ, սպասարկման սրահից կանխիկ վերցնել հասանելիք գումարը կամ դիմում գրել, վերաթողարկել քարտը»,– տեղեկացրեց ԿԲ նախագահի տեղակալը։

Ինչ վերաբերում է այն քաղաքացիներին, ովքեր քարտեր չունեն, ապա նրանք կարող են քարտեր ձեռք բերել անվճար հիմունքներով՝ Հայաստանի բանկերից: Այս գործընթացի համար անհրաժեշտ է անձը հաստատող փաստաթուղթ և հանրային ծառայության համարանիշ։ Խաչատրյանի խոսքով` ՀԾՀ–ն կարևոր է անձի նույնականացման համար։

«Այն քաղաքացիները, որոնք իրենց մոտ կունենան ՀԾՀ կամ այն վկայող որևէ փաստաթուղթ, կօգտագործեն այն, չունենալու կամ կորցրած լինելու դեպքում անձնագրի տվյալների հիման վրա կենտրոնացված բազայից բանկերի կողմից վեր կհանվեն ՀԾՀ–ները, և այդպես քարտեր կթողարկվեն»,– ասաց նա։

Քարտերը թողարկվելուց հետո, անձը պարտադիր չէ, որ այդ քարտը ներկայացնի Կառավարությանը, կրկին կենտրոնացված կարգով Կառավարությանը կներկայացվի նոր բացված քարտերի տվյալները և փոխանցումները կիրականացվեն:

Քարտերի տրամադրումը սովորաբար տևում է 2-3 աշխատանքային օր: Անձը կարող է դիմել Հայաստանի բոլոր բանկերին, բացի «Մելլաթ» բանկից և «Ֆասթ» բանկից, քանի որ այս պահին այդ բանկերը քարտային ծառայություններ չեն մատուցում: