Կեսօրից սկսած՝ ոստիկանությունը «Հայրենիք» կուսակցության շենքի դիմաց «պոստեր» էր տեղակայել․ Արսեն Բաբայան

Այս ձերբակալության դեպքը նույն ձեռագրով արդեն չորրորդն է, նույն ավտոմեքենայում գտնվող նույն անձանց արդեն չորրորդ անգամ կասկածում են ապօրինի զենք կրելու մեջ։ Այս մասին ֆեյսբուքյան ուղիղ եթերում հայտարարեց իրավապաշտպան Արսեն Բաբայանը՝  անդրադառնալով այսօր իրեն ու ընկերներին ոստիկանություն բերման ենթարկելու դեպքին։

«Սա ծիծաղելի էր որոշ ժամանակ, բայց այսօր դարձել է բավականին վտանգավոր մի երևույթ, քանի որ բազմաթիվ քաղաքացիներ, այդ թվում նաև Սրբազան շարժման մասնակիցներ այդ կասկածանքով բերման են ենթարկվել ոստիկանության բաժիններ։

ՆԳՆ քրեական ոստիկանությունը որոշել է, որ պետք է ընդդեմ օրենքի գործողություններ կատարել։ 

Դուք առիթ եք ունենալու տեսնելու շատ ծիծաղելի ու զավեշտալի իրադարձություններ։ Այս ձերբակալությունն ունի նախաբան, կեսօրից սկսած ոստիկանությունը «Հայրենիք» կուսակցության շենքի դիմաց տեղակայել էր, այսպես ասած, պոստեր։ 7-րդ վարչության, քրեական ոստիկանության միջոցով իրականացնում էր մեզ հետևելու գործընթաց։

Մենք դա ֆիքսել էինք, նրանց շարժը հսկում էինք, տեսնում էինք։ Ես գիտեի, որ պետք է իրականացնեին այն ձերբակալությունը, որն իրականացրեցին։ Ես այն մեքենայում էի, որը տեղափոխեցին ոստիկանության բաժին, որը ոստիկանությունը ներկայացրել էր իր աղբյուրներով։ Հենց այդ պատճառով էի այդ մեքենայում, քանի որ գիտեի, որ այդ մեքենան պետք է տեղափոխեն, դրա մեջ եղած անձանց ձերբակալեն, և ոստիկանությանն անակնկալի բերեցինք, երբ նրանք տեսան, որ ես էլ եմ գտնվում այդ մեքենայում»,-  նշեց Բաբայանը։

«Ինչ- որ մեկի ոչ առողջ գլխում ծնվել է միտք, որ հենց Արթուր Վանեցյանը չպիտի օգտվի «Մասնավոր պահնորդական ծառայության մասին» օրենք ծառայություններից։ Ակնհայտ է, որ սա ուղիղ քաղաքական նպատակ է հետապնդում, որովհետև այդ ինչ-որ մեկը, որի հիվանդ գլխում ծնվել է այդ միտքը, որ Արթուր Վանեցյանը Վանեցյանը չպիտի օգտվի «Մասնավոր պահնորդական ծառայության մասին» օրենքի ծառայություններից, արդեն չորրորդ անգամ ոստիկանության աշխատակիցներին ստիպում է, որ որ լիցենզավորված ծառայության  անվտանգության աշխատակիցներին, որոնք զենք կրելու իրավունք ունեն, որոնց տվյալներն ամբողջությամբ առկա  են ոստիկանության և ԱԱԾ համապատասխան բազաներում, ձերբակալեն։

Սա միտված է մի բանի, որ թույլ չտան Արթուր Վանեցյանին օգտվել օրենքով թույլատրելի ծառայությունից»,- մանրամասնեց Արսեն Բաբայանը։

Հիշեցնենք, որ այսօր երեկոյան փաստաբան Արսեն Բաբայանին ու նրա ընկերներին քրեական ոստիկանությունը ձերբակալել ու տեղափոխել էր ոստիկանություն։ Ավելի ուշ հայտնի դարձավ, որ նրանց ոստիկանություն են տեղափոխում ապօրինի զենք-զինամթերք պահելու կասկածանքով։

Արսեն Բաբայանն ազատ է արձակվել, իսկ նրա հետ եղած երկու անձինք ձերբակալվել են։