Ջրհեղեղից Տավուշի մարզում տուժել է շուրջ 1640 մարդ

Լրագրող Ոսկան Սարգսյանը Տավուշի մարզպետ Հայկ Ղալումյանին հարցրել է, թե որքան է կազմում մայիսի 26-ի ջրհեղեղից Տավուշի մարզի կրած վնասի չափը։ Մարզպետարանից պատասխանել են․

«2024 թվականի մայիսի 25-26-ի Դեբեդ և Աղստև գետերի հեղեղումների հետևանքով Տավուշի մարզում տուժել է շուրջ 1640 մարդ, որոնց կրած վնասների վերաբերյալ կազվել է 438 արձանագրություն՝ անհատական բնակելի տների, փլուզված շինությունների և ոչ բնակելի շենք-շինությունների, տրանսպորտային միջոցների, կորցրած կամ անկած գյուղատնտեսական կենդանիների, կորսված բերքատու ծառերի և մշակաբույսերի, վնասված սպասարկող և արտադրական օբյեկտների համար։ 

Տեղեկացնում եմ, որ «Հայաստանի Հանրապետության Լոռու և Տավուշի մարզերում 2024 թվականի մայիսի 25-26-ը տեղացած հորդառատ անձրևներով պայմանավորված հեղեղումների պատճառով տուժած ընտանիքներին սոցիալական աջակցության միջոցառումը և տրամադրման կարգը հաստատելու մասին» 2024թ․ հուլիսի 4-ի թիվ 1033-Լ և «Հայաստանի Հանրապետության Լոռու և Տավուշի մարզերում 2024 թվականի մայիսի 25-26-ը տեղացած հորդառատ անձրևներով պայմանավորված հեղեղումների պատճառով առաջացած արտակարգ իրավիճակի հետևանքով աղետի գոտում ֆիզիկական անձանց պատճառված վնասի փոխհատուցման կարգը հաստատելու մասին» 2024թ․ հուլիսի 4-ի թիվ 1043-Ն ՀՀ կառավարության որոշումներով հաստատվել է անհատական բնակելի տների վնասի փոխհատուցման և բնակիչների սոցիալական աջակցության կարգերը, իսկ գյուղացիական տնտեսություններին և տնտեսվարողներին պատճառած վնասի հետ կապված հարցերը գտնվում են քննարկման փուլում»։ 

«Ջրհեղեղի վնասները Լոռու մարզում ավելի մեծ են, քան Տավուշի մարզում։ Տավուշի մարզպետարանն, ավելի վաղ հղում անելով ՀՀ կառավարությանը, նշել էր ջրհեղեղից Լոռու և Տավուշի մարզում վնասներ կրած 1000 ֆիզիկական անձի և 250 տնտեսվարողների , և այն մասին, որ կառավարությունը ջրհեղեղից տուժածներին աջակցելու համար հատկացրել է 1 միլիարդ դրամ»,- գրել է լրագրողը։