Լրահոս
Հայաստան
22:13
19.04.24
163

Հետ են քաշվում ՀՀ Զինված ուժերը, Տավուշից 2,5 գյուղ հանձնվում է Ադրբեջանին. սահմանազատում

Պաշտոնապես սկսվում է հայ-ադրբեջանական սահմանազատման գործընթացը: Տավուշի հատվածը հստակեցնելու պայմանավորվածություն են այսօր ձեռք բերել Հայաստանի ու Ադրբեջանի սահմանազատման հարցերով զբաղվող հանձնաժողովները: «Առաջին անգամ մեր երկրների միջև՝ չորս գյուղերի հատվածում, գոյություն կունենա սահմանազատված պետական սահման»,- Արմենպրեսին հայտնել է վարչապետի գրասենյակը: Կից ներկայացվել է քարտեզ, ըստ որի, պետք է գծվի սահմանը: Բաղանիսից մինչև Բերքաբեր հատվածն է հստակեցվելու: Հայաստանի զինված ուժերը հետ են քաշվելու, նրանց փոխարեն սահմանապահներ են կանգնելու, կարճ, բայց ողջամիտ ժամանակահատվածում՝ առանց արհեստական ձգձգումների, հայտնել է վարչապետի գրասենյակը: Մինչև մայիսի 15-ը գեոդեզիական չափումներով պետք է կազմվի սահմանի նկարագրություն: Այն, որ Ալմա Աթայի հռչակագիրն է ընդունվել որպես սահմանազատման հիմք, պետք է նշվի նաև Սահմանազատման կանոնակարգի նախագծում, ինչը պետք է հաստատվի Ազգային ժողովում: Վարչապետի գրասենյակը հաստատում է, որ Կիրանց գյուղի մոտ ճանապարհի մի հատվածի փոփոխություն է լինելու: Ոսկեպարը ճանապարհի խնդիր չի ունենալու, քանի որ «այս փուլում այդպիսի խնդիր առաջացնելու պոտենցիալ ունեցող հատվածները չեն սահմանազատվում»: Ըստ վարչապետի գրասենյակի Ադրբեջանը ստանում է ոչ թե 4, այլ՝ երկուսուկես գյուղ, իսկ Հայաստանը՝ անվտանգային ռիսկերի նվազեցում: Հետագայում պետք է որոշվի նաև անկլավ-էքսկլավների ճակատագիրը, քանի որ Արծվաշենը Հայաստանի ինքնիշխան տարածքի մի մասն է ու չեն կարող հրաժարվել այդ խնդրից: