Ֆրանսիայի ԱԳՆ-ն կոչ է արել իր քաղաքացիներին Ադրբեջան մեկնել միայն խիստ անհրաժեշտության դեպքում

Ֆրանսիայի քաղաքացիներին, այդ թվում՝ երկքաղաքացիություն ունեցողներին, խորհուրդ է տրվում առանց ծանրակշիռ պատճառի, առանց խիստ անհրաժեշտության չմեկնել Ադրբեջան։ Այս մասին ասված է Ֆրանսիայի ԱԳՆ-ի սեպտեմբերի 4-ի հաղորդագրության մեջ։

«Ֆրանսիայի քաղաքացիները, այդ թվում՝ երկքաղաքացիություն ունեցողները, որոնք ապրում կամ տարանցիկ ճանապարհորդում են, Ադրբեջանում հայտնվում են ձերբակալության, կամայական կալանքի և անարդար դատավարությունների վտանգի առջև:

Ֆրանսիայի ԱԳՆ-ն խորհուրդ չի տվել նաև մեկնել Հայաստանի հետ սահմանակից շրջաններ, ինչպես նաև՝ Լեռնային Ղարաբաղի նախկին ինքնավար մարզի տարածք և նախկին հարակից շրջաններ»,- ասված է հաղորդագրության մեջ։

Ադրբեջանից արձագանքել են, որ այս որոշումը վկայում է Ադրբեջանի հետ հարաբերություններն էլ ավելի սրելու Ֆրանսիայի մտադրության մասին։

«Ոչ մի հիմք չկա Ֆրանսիայի արտաքին գործերի նախարարության պնդումների համար, որ Ֆրանսիայի քաղաքացիներին առանց պատճառի ձերբակալում և կալանավորում են։

Այս անհիմն հայտարարությունը իրականության խեղաթյուրում է»,- ասված է հայտարարության մեջ։

Հաջիզադեի խոսքով՝ ներկայումս Ադրբեջանում բանտարկված է Ֆրանսիայի երկու քաղաքացի։ Մարտին Ռայանին ձերբակալել են լրտեսության մեղադրանքով, գործավար Տեգո Հյուգոյին՝ Բաքվի մետրոյում գույքը վնասելու՝ վագոնների վրա գրաֆիտիի համար:

«Եվս մեկ անգամ պահանջում ենք դադարեցնել Ֆրանսիայի կողմից Ադրբեջանի դեմ զրպարտչական արշավը»,- ասված է հայտարարության մեջ։