ֆրանսիացի կինոաստղ Ժերար Դեպարդյեն մեղավոր է ճանաչվել․ դատավճիռը կբողոքարկվի

Այսօր Փարիզի դատարանը ֆրանսիացի կինոաստղ Ժերար Դեպարդյեին մեղավոր է ճանաչել 2021 թվականին «Կանաչ փեղկեր» ֆիլմի նկարահանման հրապարակում երկու կանանց նկատմամբ սեռական ոտնձգությունների մեջ և նրան դատապարտել 18 ամսվա պայմանական ազատազրկման։ 

France24 պարբերականի փոխանցմամբ՝ Փարիզի դատարանը նաև կարգադրել է, որ 76-ամյա Դեպարդյեն, որը ներկա չէր դատավճռին, գրանցվի սեռական հանցագործների գրանցամատյանում։

Ավելի վաղ Դեպարդյեն հերքել էր իր հանդեպ ներկայացված մեղադրանքները։ Նրա փաստաբանը հայտնել է, որ դերասանը կբողոքարկի վճիռը։

Դերասանին շուրջ 20 կին է մեղադրել ոտնձգությունների կամ ոչ պատշաճ պահվածքի մեջ, սակայն սա առաջին դեպքն է, որ գործը հասել է դատարան։

Հայցվորներն են 54-ամյա բեմանկարիչը և 34-ամյա ռեժիսորի օգնականը, որոնք դերասանին մեղադրել են սեռական ոտնձգությունների մեջ:

Դեպարդյեն ավելի վաղ դատական լսումների ժամանակ խոստովանել էր, որ կոպիտ է, վատ բառապաշար է օգտագործում, բայց ոչ ոքի «ձեռք չի տվել»։