Երևանում տղամարդու մոտ հայտնաբերվել է ատրճանակ՝ լիցքավորված ոսկեգույն փամփուշտներով

Վերջին օրերին ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Շենգավիթի բաժնի ծառայողները հերթական օպերատիվ տվյալներով ապօրինի զենքի հայտնաբերման դեպք են բացահայտել։

Ինչպես հայտնում է ֆոտոլրագրող Գագիկ Շամշյանը, Շենգավիթի ոստիկանությունում օպերատիվ տեղեկություններ են ստացվել, որ Երևանի բնակիչ 25-ամյա Բախշի Ս.-ն իր մոտ ապօրինի մարտական ատրճանակ է պահում։

Տեղում Շենգավիթի ոստիկանները օպերատիվ տեղեկություններով պարզում են, թե որտեղ է գտնվում նա ու համայնքային ոստիկանները՝ բաժնի պետ Արթուր Մկրտչյանի, բաժնի պետի տեղակալ Արծրուն Միքայելյանի գլխավորությամբ, մեկնում են Վերին Շենգավիթ 2-րդ փողոց, որտեղ էլ հայտնաբերում են Բախշի Ս.-ին և ապօրինի զենք-զինամթերք պահելու և կրելու ծագած հիմնավոր կասկածի առկայության հիմքով նրան տեղափոխում են Շենգավիթ ոստիկանություն։

Արդեն տեղում պարզվում է, որ տեղեկությունը հավաստի է և կասկածյալը ոստիկաններին է ներկայացնում իր մոտ եղած ատրճանակը՝ 1 հատ փամփշտատուփով, որը լիցքավորված է եղել 5 հատ ոսկեգույն փամփուշտներով։

Դեպքի փաստով ոստիկանության Շենգավիթի բաժնում փաստաթղթեր են ձևակերպվել, որոնք, ինչպես նաև կասկածյալն ու ատրճանակը, ներկայացվել են ՀՀ Քննչական կոմիտեի Երևան քաղաքի քննչական վարչության Շենգավիթի քննչական բաժին որտեղ էլ դեպքի փաստով նախաձեռնվել է քրեական վարույթ։